Die jaarlikse Absa Wildeklawer-skolesporttoernooi het Woensdag by Hoërskool Diamantveld in Kimberley afgeskop.
Die toernooi is in sy 15de bestaansjaar en topskolespanne sal tot Sondag op onderskeidelik die netbalbaan, sokker- en rugbyveld kragte meet.
Altesaam 195 spanne van 111 skole neem deel aan die toernooi, een van die land se gesogste sporttoernooie. Daar is vanjaar 35 spanne uit die Noord-Kaap.
Twee internasionale rugbyspanne maak ook hul buiging in vanjaar se toernooi. Die spanne is van St John’s College in Nieu-Seeland en die Kirkham Grammar School in Engeland.
Nuwe deelnemers is Hoërskool Noordheuwel en Nico Malan Hoërskool terwyl Hoërskool Waterkloof en Hoër Landbouskool Marlow hul terugkeer na die toernooi maak.
Woensdagaand se openingseremonie het ʼn hoendervel-oomblik opgelewer met die seuns van St John’s College wat ʼn tradisionele haka gedoen het.
Die sportbyeenkoms is bekend vir sy nalatenskap en betekenis in die wêreld van skolesport.
Dit het in 2009 met 12 spanne in die Paarl begin, en hierdie toernooi het vanjaar tot ʼn wêreldwye verskynsel ontwikkel.
Die 2024-toernooi, wat nou rugby, netbal en sokker insluit, spog met ʼn rekord aantal spanne van verskillende uithoeke van die wêreld.
Cassie Carstens, toernooibestuurder, sê hulle is opgewonde om te sien hoe die toernooi nuwe hoogtes gaan bereik.
“Wat hierdie jaar nog meer spesiaal maak, is die inklusiewe gees, met die opwindende toevoeging van twee internasionale skole tot die reeks.
“Hierdie geleentheid gaan nie net oor kompetisie nie; dit gaan oor die bevordering van vriendskappe, sportmanskap en ʼn liefde vir die spel.”
Die toernooi se visie is duidelik: om gelyke geleenthede aan skole van alle vlakke te bied om deel te neem en hul talente op ʼn internasionale verhoog ten toon te stel.
“Deur samehorigheid en kameraadskap te bevorder poog die toernooi om die volgende generasie atlete te inspireer,” het Carstens gesê.
“Ons bied nie net ʼn toernooi aan nie; ons is besig om die toekoms te help vorm. Deur sport bou ons sterker gemeenskappe en koester ons die leiers van môre.”
Sportliefhebbers kan die aksie regstreeks op SuperSport Schools dophou.