Tristan Stubbs was nog altyd ʼn talentvolle krieketspeler. Wie sal sy beurt van 72 lopies van slegs 28 aflewerings vir die Proteas teen Engeland in Bristol vergeet?
Maar hy het telkemale met sy bestendigheid op die internasionale verhoog gesukkel: Een briljante grenshou is ongelukkig deur ʼn paaltjieverloor-sessie opgevolg.
In die jongste weergawe van die Indiese Premierliga (IPL) het hy egter sy mojo gevind.
Stubbs het in 11 kolfbeurte vir die Delhi Capitals 318 lopies teen ʼn gemiddeld van 53 en ʼn treftempo van 188,16 gemoker.
Hy het die bal reeds 22 keer oor die grenstou gejaag en onder die Suid-Afrikaners het net Faf du Plessis (352 lopies) en Heinrich Klaasen (339 lopies) meer lopies as hy in die skatryk mik-en-moker-toernooi aangeteken.
Daar is natuurlik ʼn paar hoogtepunte wat uitstaan.
Die 23-jarige kolwer het onder meer 26 lopies van een boulbeurt geslaan, hy spog met 71 onoorwonne lopies van slegs 25 aflewerings teen die Mumbai Indians en hy het Dinsdagaand weer met die wilgerlat teen die Rajasthan Royals uitgeblink.
Tristan Stubbs with another impactful cameo of 41 off 20 balls#IPL2024pic.twitter.com/88M3JTdOWT
— Werner (@Werries_) May 7, 2024
Stubbs het ses grenshoue in sy blitsbeurt van 41 lopies van 20 balle gemoker en hy het saam met Jason Fraser-McGurk toegesien dat die Capitals 221/8 kon aanteken.
Sy spelpeil moet beslis die aandag van die Protea-keurders trek en met die T20-Wêreldbeker om die draai, kan hy bykomende slaankrag aan die Suid-Afrikaners se kolflys verleen.
ʼn Elftal van Quinton de Kock/Ryan Rickelton, Reeza Hendricks, Aiden Markram, David Miller, Heinrich Klaasen, Stubbs, Marco Jansen, Keshav Maharaj, Gerald Coetzee, Kagiso Rabada en Tabraiz Shamsi is seker goed genoeg om sake ver in die toernooi te vat.
Of hoe?
Imagine Klassen and Stubbs batting in the last 5 overs for South Africa in the World Cup. Scary thought.
— Irfan Pathan (@IrfanPathan) May 7, 2024
- Opsomming van die telkaart:
Delhi Capitals 221/8 in 20 boulbeurte: Abishek Porel 65, Jason Fraser-McGurk 50 en Ravichandran Ashwin 3/24.
Rajasthan Royals 201/8 in 20 boulbeurte: Sanju Samson 86, Riyan Parag 27 en Kuldeep Yadav 2/27.
Stubbs is overprices en overrated.