Verlepte Proteas vou wéér teen Indië

Foto: (AP Photo/Rajanish Kakade)

Kyk, dit is oukei as ’n krieketspan verloor; elke span moet een of ander tyd ’n wedstryd verloor. Die gevaarligte begin egter flikker wanneer die span futloos, planloos en sonder enige teenstand die wedstryd prysgee.

In die Protea-geledere het die gevaarligte lank reeds begin flikker (sommer al daar by die Wêreldbeker-toernooi) en ná vanoggend se tweede agtereenvolgende loesing teen Indië trek die doemprofete beslis laer om die beleërde Suid-Afrikaanse toetsspan.

Faf du Plessis se span het die tweede toets in Pune met ’n beurt en 137 lopies verloor nadat hulle vanoggend in hul opvolgbeurt vir 189 uitgeknikker is.

Dít nadat Indië – met ’n skitterende Virat Kohli voor in die koor – ’n reusagtige 601/5 in hul enigste kolfbeurt aangeteken het.

Daarna het die tuisspan se boulers onder die Protea-kolwers baljaar. Dit was egter nie net draaiers soos Ravichandran Ashwin (4/69 en 2/45) en Ravindra Jadeja (1/81 en 3/52) wat amok gemaak het nie, maar die sneltrein Umesh Yadav het óók vir Protea-kopsere gesorg.

Foto: (AP Photo/Rajanish Kakade)

Aiden Markram is byvoorbeeld in beide Protea-kolfbeurte vir ’n nulletjie deur die Indiese snellers uitgeknikker.

Tog was dit nie altyd die briljantheid van die Indiese boulers wat vir die paaltjies gesorg het nie.

Daar is niks fout met die talentvolle Quinton de Kock se aanvallende houespel nie. Maar soos die wyse Prediker sê: Daar is ’n tyd en ’n plek vir alles.

En met jou span se telling op 79/4 in hul opvolgbeurt, is dit dalk nie die beste tyd om jou mokerveeghou-repertoire uit jou houekas te haal nie.

Hierdie is die Indiërs se grootste sege nóg teen Suid-Afrika. En hulle kon die toets netsowel maar met 1 000 lopies gewen het.

Indië het nou 200 punte op die Wêreldtoetskampioenskap se amptelike punteleer. Daarteenoor het die Proteas nog nie ’n enkele puntjie bymekaar geskraap nie.

En as dinge só aangaan, weet ʼn mens ook nie of hulle punte in dié reeks sal kry nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Aw

Eina !!

Vita

Swak Kapt , swak afrigter, spelers kan nie druk hanteer nie, vloek mekaar op veld, het geen boul aanval nie, ons beste sit in Engeland

Thys

Meng God…Alla aabidders en voorvader geeste aanbidders …die , die resultaat

Paul

Ja hulle is ook getransformeer na rommel status. Viva ANC regering. Nog ‘n mislukking op jul kerfstok

Niel Mare

Is daar nie dalk enige Japannese krieketspelers wat ons in die Vroteas se span kan opneem nie ? Hulle het ten minste veggees , trots , vasbyt en speel tot die eer van hul land !
Soos die befaamde rugbyanalis altyd gese het : ” Nag ou Kleintjie ( sic ) ” !!!!