Die NWU-Pukke het nege drieë teen die Shimlas gedruk. Foto: Twitter.
Die NWU-Pukke, of die Arende soos wat hulle deesdae bekendstaan, het met een van hul beste vertonings nóg teen die Shimlas vorendag gekom.
Die Potchefstroomse studente het die kragmeting met 63 – 16 op die Fanie du Toit-sportterrein gewen om volpunte vir hul spogvertoning te verdien. Hulle is tans eerste op die punteleer met tien punte.
Die Shimlas het egter die sterkste begin toe Michael Annies binne die eerste minuut van die wedstryd deur die tuisspan se verdediging gebars het. Dit was egter daarna eenrigtingverkeer en die Pukke het nege drieë gedruk.
- Puntemakers:
NWU: Drieë: Theuns Pretorius (2), Keano Windvogel (2), Vernon Paulo, Naiden Jaarts, Armin Posthumus, Jandré de Beer en Ruben du Plessis. Doelskoppe: Zinedine Robinson (4) en Martin Venter. Strafskoppe: Robinson (2).
Shimlas: Drieë: Michael Annies en Renier Viljoen. Doelskoppe: Ethan Wentzel (2).
Bloemfonteiners maak amok in Stellenbosch
Die Sentrale Universiteit vir Tegnologie (CUT) het vir ʼn tikkie geskiedenis gesorg toe hulle slegs die vyfde Varsitybekerspan ooit geword het om die Maties op die Danie Craven-stadion in Stellenbosch te klop.
Die tuisspan was vroeg op die agtervoet toe hulle twee geel kaarte gekry het en hoewel hulle probeer het om daarna ʼn terugvegpoging te loods, het hulle steeds die wedstryd met 23 – 19 verloor.
Om dinge net vinnig in perspektief te plaas – CUT het nie een van hul vorige kragmetings in Stellenbosch met minder as 40 punte verloor nie.
- Puntemakers:
CUT: Drieë: Tokelo Ntaopane en Asekho Marubelela. Doelskoppe: Tyler Sefoor (2). Strafskoppe: Sefoor (3).
Maties: Drieë: McKyle Volmoer, Francois Beytenbach en Ammaar Burton. Doelskoppe: Jurie Matthee (2).
FULL TIME and @cutfsonline have shocked @MatiesSport at the Danie Craven stadium. The Ixias pull off a historic win in Stellenbosch despite a vialiant attempt by the maroon machine.
FNB Maties 19 – 23 FNB CUT#RugbyThatRocks proudly brought to you by FNB, Steers and Suzuki pic.twitter.com/rqFN2e5XKS
— Varsity Cup (@varsitycup) February 27, 2023
Verdedigende kampioenspan verloor in die Kaap
Tukkies, die verdedigende kampioenspan, het sy tweede nederlaag op ʼn streep gely toe hy met 40 – 19 teen Ikeys in Kaapstad vasgeval het.
Die Kapenaars se Ntokozo Makhaza was sy span se groot ster en benewens sy ses suksesvolle stelskoppogings, het hy ook twee drieë gedruk.
Tukkies beklee tans die laaste plek op die amptelike punteleer.
- Puntemakers:
Ikeys: Drieë: Ntokozo Makhaza (2), Alex Castle, Jason McLeod-Smith en Duran Koevort. Doelskoppe: Makhaza (3). Strafskoppe: Makhaza (3).
Wits wen stryd van die Johannesburgers
Wits het op hul tuisveld die Universiteit van Johannesburg (UJ) met 35 – 33 geklop. O ja, die Witwatersrand-manne het ʼn rustydagterstand van 30 – 0 uitgewis om dié een te wen.
Die tuisspan het boonop die wendrie in die doodsnikke van die wedstryd gedruk – jip, UJ gaan waarskynlik nog vir ʼn paar dae aan bomskok ly.
- Puntemakers:
Wits: Drieë: Ziyanda Masipa (2), Kyle van Eyssen en George Devenish. Doelskoppe: Christian Humphries (4).
UJ: Drieë: Philip Apea-Adu, Prince Nkabinde, Rowan Malgas en Likhaya Tengimfene. Doelskop: Jonathan Viljoen. Strafskop: Viljoen.
83' TRY and FULL TIME????! Gershwin Mouton scores in added time and @WitsSport have pulled off one of the greatest comebacks in FNB Varsity Cup history as they over turn a 0-30 deficit at half time to beat @UJ_Sport in the Joburg derby!
FNB Wits 35-33 FNB UJ#RugbyThatRocks! pic.twitter.com/KBe7vrUAT2
— Varsity Cup (@varsitycup) February 27, 2023
Wie sal nou glo dat die Ixias Maties op Stellenbosch sou klop en Tukkies kry ook sommer groot pakslae. Dit is fantasties dat die ander spanne wat gewoonlik aan die agterspeen suig in die kompetisie so goed vaar.
Tuks se koshuisspanne van die 1970s en ’80s sou al hierdie spanne geklop het.