Dylan Sage in aksie op die sewesrugbyveld. (Foto: Rodger Bosch/AFP)
Die Blitsbokke speel Vrydag in hul eerste twee wedstryde van die Singapoer-sewestoernooi teen Spanje en Samoa en Philip Snyman sal ongetwyfeld die spelherlewingsvure wil stook.
Die Suid-Afrikaners het ʼn veel beter vertoning in die vorige toernooi in Hongkong gelewer waar hulle onder meer met Ierland en die einste Spanjaarde klaargespeel het.
Snyman is deesdae die Blitsbokke se tydelike hoofafrigter en hy het spelers soos Shakes Soyizwapi en Dylan Sage vir die Singapoer-avontuur nadergetrek.
Die 32-jarige Sage is ʼn veteraan van 26 sewestoernooie en hy het die afgelope paar jaar vyftienmanrugby saam met die Bulls en Montauban in Frankryk gespeel.
Die Olimpiese Spele dien as goeie motivering en selfs al het die Suid-Afrikaners nog nie vir die sportskouspel in Parys gekwalifiseer nie, is Sage oorgehaal om ʼn verskil in Blitsbok-kleure te maak.
“Ja, niks is nog ʼn gegewe nie, maar ek is bereid om dinge ʼn kans te gee,” het hy gesê.
Sage het weliswaar ʼn hele rukkie gelede sy laaste Blitsbok-wedstryd gespeel, maar hy vertel dat hy sonder veel moeite weer sy voete in die groep gevind het.
“Ek het al baie rugby saam met die meeste van die senior spelers gespeel en daar is net ʼn paar nuwe spelers aan wie ek moet gewoond raak. Ek wil nou net toernooie speel en weer my voete op die maat van sewesrugby laat dans.”
Die Blitsbokke is tans sewende op die amptelike HSBC-punteleer met 58 punte nadat hulle die eerste toernooi van die seisoen in Dubai gewen het.
Dylan Sage and Siviwe Soyizwapi are like kids in a candy store, with their #Blitzboks return imminent ????#PoweredByUnity pic.twitter.com/mCubUjUev1
— Springbok Sevens (@Blitzboks) April 30, 2024
Blitsbok-groep vir Singapoer: Christie Grobbelaar, Impi Visser, Zain Davids, Tiaan Pretorius, Selvyn Davids (kaptein), Dewald Human, Shakes Soyizwapi, Shilton van Wyk, Rosko Specman, Tristan Leyds, Dylan Sage, Quewin Nortjé en Katlego Letebele.
Bepalings:
Vrydag:
07:58: Suid-Afrika teen Spanje
13:18: Suid-Afrika teen Samoa
Saterdag:
08:24: Suid-Afrika teen Frankryk
