Leon van Nierop se resensie: How to Train Your Dragon: The Hidden World

How to Train Your Dragon: The Hidden World **** (7/10)
Met die stemme van Kit Harrington en Jay Baruchel
Regisseur: Dean DeBlois

Wanneer het jy laas saam met jou kinders deur die lug gevlieg op die rûens van drake sonder tande? Drie jaar gelede dalk in die tweede How to Train Your Dragon? En toe het jou hare al penorent gestaan van uitbundige plesier. Wel, nadat jy hierdie drake-kaperjolle gesien het, sal jou vermaak-kliere dalk ook ʼn stewige adrenalien-inspuiting kry. Want al wat die fliek probeer doen, is om jou saam met jou kinders te vermaak terwyl dit ʼn sedelessie leer: Kry ʼn troeteldier! Dis jou goeie reg, maar onthou net dat die diertjie ook kan grootword. En wat gebeur dan?

ʼn Mens gaan kyk nie eintlik na die derde Dragon-fliek vir die storie nie, want soos gewoonlik is daar nare despote wat die ondiertjie wil vang en vernietig. Onthou, die aarde moet van drake gesuiwer word, a nee a! Probeer bietjie vooruit voorspel wat hier gaan gebeur! Jip! Jy is reg. Die drake vlug na ʼn weggesteekte wêreld wat as ʼn soort drakehemel beskryf kan word en waar hulle in vrede kan vlieg, maar wat net tot sy reg kom in IMAX-teaters.

Verwag dus dat die kleingoed gaan neul vir 3D-brille én IMAX. Dit sal ʼn heerlike naweekgeskenk wees. En dan is daar die bekkige karakters: Vikings wat mekaar beledig, skurke wat smalende aanmerkings maak en drakies wat kompleet nes ʼn kat spin wanneer hulle verlief raak, of nie brul nie.

Die derde How to Train Your Dragon is vet pret met ʼn storie wat die kleinspan darem behoort te boei. Pa en Ma sal gou deur die storietegnieke sien. Maar so vroeg in Februarie, wanneer almal weer begin stoom opbou vir die Nuwejaar, behoort dit goed met Coke en springmielies af te gaan!

Die fliek vertoon tans by SterKinekor en NuMetro

Leon van Nierop resenseer weekliks rolprente soos hierdie een op sy Facebook-blad. Besoek ook sy blad vir resensies oor rolprente met lokprente en interessante feite.

Leon van Nierop

Meer oor die skrywer: Leon van Nierop

Leon van Nierop is ’n bekende radiopersoonlikheid, rolprentresensent, vryskutjoernalis, stemkunstenaar, skrywer van romans, radio- en TV-vervolgverhale soos Wolwedans in die skemer en Ballade vir ’n enkeling asook die draaiboeke van die rolprente geskoei op hierdie twee verhale. Hy was vier jaar lank hoof van die Rolprentakademie van die Tshwane-Universiteit van Tegnologie en tree dikwels as dosent en spreker oor rolprente op. Sy boek oor die geskiedenis van die Afrikaanse rolprenbedryf, Daar doer in die fliek, is verlede jaar uitgegee. Sy jongste romans, Sielsmokkelaar en Stralerjakkers, verskyn later vanjaar.

Deel van: Flieks

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae