Van links na regs: Anina Wasserman (koloratuursopraan), Lizelle le Roux (violis) en Andries Aldrich (bariton). (Foto: Verskaf)
Is jy uitgehonger vir ʼn konsert met kunsmusiek op die program? Dan behoort dié brokkie goeie nuus ʼn huppel in jou stap te sit.
Die Foxwood-teater in Houghton, Johannsburg, bied Sondag (28 Maart) The Art of Music aan, ʼn uitvoering bestaande uit bekende arias, Broadway-treffers en Suid-Afrikaanse kunsliedere.
Uit die Fanz Lehár- operette Die vrolike weduwee is “Vilja” ingesluit en daar is ook Neapolitaanse gunstelinge soos “Santa Lucia”, Broadway-treffers soos “Some Enchanted Evening” en Afrikaanse kunsliedere soos “Die sewe Boerneef-liedjies” van Pieter de Villiers en “Heimwee” van S le Roux Marais.
Die kunstenaars wat optree is Anina Wasserman (koloratuursopraan), Andries Aldrich (bariton), Lizelle le Roux (violis), Elise Lemmer (pianis) en Susan Steenkamp-Swanepoel (pianis).
Wasserman is opgewonde oor die uitvoering, “natuurlik oor die wonderlike musikante en fantastiese programsamestelling,” meen sy.
The Art of Music begin Sondag om 12:00 en kaartjies kos R 150. Die Foxwood-restaurant sal versnaperings en middagete voor en na die konsert bedien. Besprekings vir konsert en restaurant kan gemaak word deur ʼn e-pos te stuur na [email protected] of [email protected].
Die teater is by Vyfde Straat 13, Houghton Estate, Johannesburg. Navrae: 011 486 0935.
- Alle Covid-19-regulasies sal streng gevolg word.
