Rafael Nadal het goed op die baan teen Darwin Blanch beweeg. (Foto: Oscar del Pozo/AFP)
Rafael Nadal het sy Madrid-opeveldtog op ʼn wennoot begin toe hy die Amerikaanse tiener Darwin Blanch met 6-1 en 6-0 oorrompel het.
Die wêreld se voormalige no. 1-speler het op ʼn stadium nege potte op ʼn streep gewen om die kragmeting in net 64 minute te beklink.
Die wedstryd het sommer ook vir ʼn rekord gesorg: Dit is die grootste ouderdomverskil (21 jaar en 117 dae) nóg tussen twee spelers in ʼn ATP 1 000-wedstryd.
Hoewel Nadal tevrede is met sy vertoning teen Blanch, meen hy dat hy nog hard aan sy spel moet werk.
“Ek het nou teen ʼn teenstander met ʼn baie blink toekoms gespeel, maar ek het nogtans hopeloos te veel foute op die baan gemaak. Ek wou eintlik net ʼn stewige vertoning opdis en nie hoërisikotennis speel nie,” het die wenner van 22 Grand Slam-titels gesê.
Incase you missed it… ????@RafaelNadal did this ????@MutuaMadridOpen | #MMOPEN pic.twitter.com/donJIN3EHY
— ATP Tour (@atptour) April 25, 2024
Nadal sal in die volgende ronde teen Alex de Minaur te staan kom – ʼn speler wat sy terugkeer in Barcelona met ʼn sterk vertoning kortgeknip het.
“Ek verwag weer eens ʼn taai stryd teen Alex, maar ek kry ʼn geleentheid om te speel en ek is ongelooflik dankbaar daarvoor. Ek sal my bes doen om mededingende tennis te speel, maar hy is ʼn topgehalte speler wat teen ʼn vinnige pas speel.”
Volgens Nadal is hy realisties oor sy loopbaan en hy sal ʼn besluit oor sy Franse Ope-deelname ná die Italiaanse Ope in Rome maak.
Uitslae:
Rafael Nadal klop Darwin Blanch met 6-1 en 6-0
Matteo Arnaldi klop Christopher O’Connell met 6-4 en 6-1
Lorenzo Sonego klop Richard Gasquet met 6-2 en 7-5
Felix Auger-Aliassime klop Yoshihito Nishioka met 4-6, 6-1 en 6-4
Tomas Machac klop Emil Ruusuvuori met 6-4, 1-6 en 6-2
Iga Swiatek klop Wang Xiyu met 6-1 en 6-4
Sloane Stephens klop Elise Mertens met 3-6, 6-3 en 6-1
Ons Jabeur klop Anna Karolina Schmiedlova met 6-4, 5-7 en 6-3
Coco Gauff klop Arantxa Rus met 6-0 en 6-0
Beatriz Haddad Maia klop 6-3 en 6-2
Jelena Ostapenko klop Jessica Bouzas Maneiro met 6-3 en 6-1
Maria Sakkari klop Donna Vekic met 6-3 en 6-2
Victoria Azarenka klop Tatjana Maria met 6-3 en 6-1
