‘Op my eish!’: Brendan kies sy top-12

Brendan Peyper en Jo Black. (Foto: verskaf)

Ná ŉ lang dag van blitsafsprake, het die sanger Brendan Peyper uiteindelik besluit watter meisies saam met hom die Oos-Vrystaat gaan plat toer.

In die eerste aflewering van die derde seisoen van kykNET se gewilde maatsoekprogram, Op my eish!, ontmoet Brendan die 16 meisies wat uit hordes inskrywings sy oog gevang het.

Van ŉ blonde rabbedoe met ŉ liefde vir visvang, tot ŉ Namibiese skoonheid en teruggetrokke hoërskoolonderwyseres is in die “Insomnia”-sanger se visier.

Brendan en sy vlerksleepvriend, oftewel wingman, Jo Black, het deur tientalle inskrywings geblaai om Brendan se topsestien te kies.

Dié 16 vroue het elkeen ŉ uitnodiging ontvang om op ŉ vyfminutelange blitsafspraak met Brendan by die De Harte-trouvenue in Pretoria te gaan.

Uiteindelik was dit Christine Kirkcaldy, Katja Pieters, Janae Stander, Sonel van der Walt, Thelmané Wentzel en Runet van Heerden wat met intrapslag Brendan se hart vinniger laat klop het.

Dié ses vroue het elkeen ná hul afspraak ŉ goue kaartjie ontvang wat hulle outomaties na die volgende ronde van die program deurgesit het. Twee van hierdie vroue het vanuit die buiteland vir die 27-jarige hartebreker ingeskryf, Katja vanuit Namibië en Runet vanuit Dubai.

Ná afloop van die blitsafsprake, het die res van die hoopvolle vroue gehoor wie ry en wie bly. Chaunté de Bruyn, Rachelle Fourie, Natasha van Rensburg, Luzaan Marais, Nadia Olivier en Jané Bacher is uiteindelik gevra om te bly.

In die volgende episode begin die reis vir Brendan en sy top-12 in die Oostelike dele van die Vrystaat, ŉ deel van die land wat hom na aan die hart lê.

Brendan het ook sy hart aan sy vlerksleepvriend ontbloot met sy erkenning aan Jo dat hy eendag drie of vier kinders wil hê, en dat sy vrou tuis moet wees om na die kinders om te sien.

“Ek sal daarvan hou om ŉ lekker vol huis te hê. Ek wil graag maksimum vier of vyf optredes ŉ maand doen. Ek wil optree omdat dit vir my lekker is, nie omdat ek dit hoef te doen om geld te maak nie.”

“Ek wil hê my vrou moenie werk nie, sy moet by die huis wees by die kinders.”