Skermgreep uit die video
ʼn Amerikaner wat al jare lank werkloos is, is in diens geneem toe hy net ná ʼn werksonderhoud ʼn heldedaad verrig het.
Volgens The Guardian het Ron Nessman verlede week ʼn baba se lewe gered. Hy het ʼn werksonderhoud gehad by ʼn Applebee’s-restaurant in Kalifornië toe ʼn baba in ʼn stootwaentjie weggerol het in die rigting van aankomende verkeer.
Hy het vinnig agter die stootwaentjie aangehardloop en dit betyds tot stilstand gebring en die kind se lewe gered.
“Ek het nie kans gehad om daaroor te dink nie,” het Nessman aan die plaaslike nuusstasie KOVR-TV gesê oor sy optrede. “Mens reageer maar net.”
Nessman het op ʼn bankie buite die restaurant gesit toe hy die noodgeval voor hom sien ontvou het.
ʼn Vrou het in die oprit van ʼn nabygeleë motorwassery stilgehou en haar agterkleinneef in ʼn stootwaentjie gelaai toe ʼn sterk wind die waentjie laat wegrol het. Die vrou wou agterna hardloop, maar het geval en gesukkel om weer op te staan. Sy moes hulpeloos toekyk hoe die waentjie al hoe verder wegrol in die rigting van aankomende verkeer.
“Daar was ʼn sterk wind en teen die tyd dat ek by die stootwaentjie uitgekom het, was dit reeds byna in die straat,” het Nessman aan ABC News gesê. “Ek het gesien die waentjie gaan voor die verkeer in rol. Ek het net instinktief na die waentjie toe gehardloop en kon dit keer voor dit voor die verkeer beland het.”
Hy het daarna na die “getraumatiseerde” versorger gestap en haar omhels.
“Sy het gehuil. Sy was baie geskok, en daarom het ek vir haar ʼn drukkie gegee.”
Nessman is al vir sowat agt jaar haweloos en werkloos en het die afgelope paar maande glo by sy sussie gebly terwyl hy werk soek.
KNSD het op 4 Mei berig Applebee’s het ná die voorval Nessman in diens geneem. Hy sou die volgende dag met opleiding begin.
Hy het intussen glo ook ander werksaanbiedinge gekry soos verfwerk en om weer groot vragmotors te bestuur.
“Ek waardeer die geleentheid wat Applebee’s vir my gegee het,” het hy aan KNSD gesê. “Dis baie cool.”
Another HERO???? surveillance video captures a homeless man saving a baby in a stroller rolling toward heavy traffic. The baby’s aunt was unloading items on the backseat of her SUV parked outside of the A1 Hand Car Wash, when the stroller started to roll away towards the street.… pic.twitter.com/wihD0EmNFQ
— DeL2000 (@DeL2000) May 4, 2023
Ag hoe wonderlik!!
Ek is bly vir die man wat nou ‘n werkie het, en dat die baba ongedeerd is.
Ek dink nie enige mens sal SO hard neerval indien dit fake is nie! Sy het regtig vrek hard neergeslaan.
Hartverskeurent mooi.
Is dit ‘n ou tannie of wat. Dis darem ‘n gesukkel!!!! Sy het seker van skok lam geword of iets