Die legendariese Amerikaanse sanger Tony Bennett is Vrydag in New York dood. Hy was 96 jaar oud.
Bennett was veral bekend vir sy ikoniese liedjies soos “The Way You Look Tonight”, “Body and Soul” en “(I Left My Heart) In San Francisco”.
Bennett het in sy loopbaan saam met groot name in die bedryf gewerk – van Aretha Franklin tot Frank Sinatra.
Sylvia Weiner, Bennett se woordvoerder, het sy dood vroeër vandag bevestig, berig BBC. Die oorsaak van sy dood is nie in dié stadium bekend nie.
Alzheimer se siekte is in 2016 by Bennett gediagnoseer.
Bennett het in 2014 op die ouderdom van 88 die oudste persoon nóg geword om ʼn nommer een op die Amerikaanse albumverkopelys te behaal met sy versameling duette saam met Lady Gaga.
In sy loopbaan het hy miljoene plate verkoop en nie minder nie as 20 Grammys gewen.