Afrikaans het vir die eerste keer op 8 Mei 1925 sy status as amptelike taal in Suid-Afrika ontvang. In die aanloop tot volgende jaar se groot feesvieringe van die taal se 100ste verjaarsdag, het Alexander Mickel vir Maroela-lesers ʼn brief uit Duitsland gestuur.
Alex is ʼn Duitser wat homself Afrikaans leer skryf en praat het. Hy is nou ʼn passievolle Afrikaanssprekende in Duitsland met ʼn groot netwerk Afrikaanse vriende in Suid-Afrika. Sy brief word gepubliseer net soos hy dit aan ons gestuur het. Die brief is nie geredigeer of teksversorg nie. -Red
Afrikaans vier op 8 Mei sy 99ste verjaarsdag as amptelike taal. As ‘n Duitser, wat homself Afrikaans geleer het, het ek nou al elf jaar saamgevier en sien uit na die 100ste verjaardag en my twaalfde jaar met die taal. Mag daar nog baie wees …
Afrikaans het my lewe verryk deurdat ek tekste in Nederlands en Vlaams ook kan verstaan. Ek hou van Afrikaanse woorde soos “gunsie”, “lekker”, “koffie”, “mooi” en veral “flippen”. “Braai” natuurlik ook!
Ek het kontak gemaak met so baie vriendelike mense – almal van hulle laat my hart warm klop! Ek geniet ook die kontak met Afrikaanssprekendes uit die onderwys of instellings soos Akademia. Ek is altyd gretig om nuwe woorde te leer en dit is hoe ek die taal aan my kant lewendig hou: ek gebruik dit eenvoudig, nogal (per ongeluk) by my Duitse vriende en kollegas, en ek maak van elke ding ‘n taalles en kom vra wanneer ek iets nie verstaan het nie, of wat iets beteken! Dit maak dat Afrikaanssprekendes oor hul taal moet nadink en soms ook nuwe dinge byleer.
Baie dankie aan alle Afrikaanse kennisse en vriende wat in my Afrikaanse pad belangstel! Baie dankie, Maroela Media, dat julle die pad net so saamgeloop het met my en 2017 my eerste lesersbrief gepubliseer het!
Baie dankie aan alle mense en organisasies wat die taal bevorder en beskerm! Hou so aan!
Veels geluk, Afrikaans, met jou 99ste verjaardag!
Lees Alex se skrywes op Maroela:
- https://maroelamedia.co.za/afrikaans/n-afrikaanse-brief-vir-jou-uit-duitsland/
- https://maroelamedia.co.za/afrikaans/moedertaaldag-n-brief-uit-duitsland/
- https://maroelamedia.co.za/debat/rubrieke/afrikaanse-alex-uit-duitsland-ek-stoor-die-woorde-in-my-hart/
- https://maroelamedia.co.za/leefstyl/reis/afrikaanse-alex-uit-duitsland-kom-kuier-in-die-kaap/
- https://maroelamedia.co.za/afrikaans/afrikaans-is-plesierig-en-buitelanders-leer-dit-so/
Herzlich Wilkommen, Freund!
Lekker om van vriende uit die buiteland te hoor! Mag jy nog 12 jaar en meer lekker saam met ons gesels.