Gedig: Opsystaan

Argieffoto (Foto: lovetotakephotos, Pixabay)

Tom Gouws (1961 – 2018)

Uit: Opsystaan

3. uitsig op kanaän
klim op hierdie gebergte … en aanskou die land Kanaän wat Ek aan die kinders van Israel as besitting sal gee.
– DEUT. 32:49

U het my, Here, lank gevoed op u rare smaak.
op manna en kwartels het U my versadig maer gemaak;
my versoen met sprinkaan en wilde heuning as rantsoen.
my genadebrood, by wyse van spreke, was U toedoen.
maar waar U my nou van hier met dowwe oë laat uitkyk
op ʼn paradys verlore vrugte, bring u my verras van stryk,
in die vrugbare vallei onder, intiem beskut binne oewers,
versterk U oorvloedig die innerlike van fynproewers:
swaar druiwekorrels en geurige appels, amandels, geilgroen
vyebotsels, reusemoerbeie, ʼn sondeurdrenkte boerpampoen.
U laat my oë onbeperk streel oor die oes van die seisoen.
U proe op my tong die inkennige kroon van waatlemoen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.