Woord:
flussies
Betekenis:
Kort gelede; so ewe; nou net: En toe Mina die bybeltjie toeslaan, het om die warm vuurkan maar weer dieselfde lied van flussies opgeklink (Jochem van Bruggen). Flussies was dit ‘n ander storie by hom (J.H. Malan). Sy vrolikheid van flussies is heeltemal weg (J.J. Hattingh). Hy is nou vrymoediger; sy senuweeagtige vlaag van flussies is verby (Mikro).
Waar kom dit vandaan?
Uit verouderde Nederlands flusjes (ongeveer 1600) “aanstons, straks”. Eerste optekeninge in Afrikaans by Pannevis (1880) en Mansvelt (1884).
Hierdie interessante brokkie is aan Maroela Media se Taaltoffie verskaf deur die Woordeboek van die Afrikaanse Taal. Ondersteun gerus hulle Borg ‘n Woord-projek.
Ek vind die verbintenis van die woord “flussies” met die verouderde Nederlandse woord ” flusjes” effe vreemd. Ons woord “flussies” verwys na die verlede (nou net, kort gelede) terwyl die ou Nederlandse woord “flusjes”duidelik na die toekoms (aanstons, straks) verwys . Kan iemand my onrustigheid oor hierdie verklaring tot ruste bring? Dankie vir die voorreg om ‘n “Maroela-fonteiner” te mag wees!