Die Kaapstad Internasionale Lughawe (Foto: Cape Town Airport/Twitter)
Derrick America, DA-woordvoerder van mobiliteit in die Wes-Kaap skryf:
Die DA in die Wes-Kaap is bekommerd oor die dringende behoefte aan die uitbreiding van die Kaapstad Internasionale Lughawe. Die Stad Kaapstad het oor die afgelope paar jaar ʼn geweldige groei in toerisme beleef en is nou terug op pre-Covid-vlakke, terwyl die lughawe ontelbare toekennings ontvang het wat sy status as die beste lughawe in Afrika bevestig. Tog bring sukses uitdagings mee.
Kaapstad Internasionale Lughawe het ʼn bedrywige draaipunt vir reisigers geword, en die roete tussen Johannesburg en Kaapstad is een van die besigste roetes ter wêreld. As gevolg hiervan staan ons plaaslike vliegskole, wat ʼn belangrike rol speel in die opleiding van ons toekomstige vlieëniers, voor ʼn aansienlike stryd om lugspasie vir opleidingsdoeleindes te verkry. Dit belemmer nie net die ontwikkeling van aspirant-vlieëniers nie, maar hou ook veiligheidskwessies in as gevolg van oorvol lugruimtes.
ʼn Uitbreiding van die Kaapstad Internasionale Lughawe sal talle voordele meebring wat verder strek as die lugvaartbedryf.
Derrick America (Foto: Verskaf)
Eerstens sal dit honderde nuwe werksgeleenthede skep vir ons burgers en ekonomiese groei stimuleer. Die konstruksieproses self sal werkgeleenthede genereer en verskeie sektore, insluitend konstruksie, ingenieurswese en gasvryheid, stimuleer.
Verder sal ʼn uitgebreide lughawe die stad se aantreklikheid vir internasionale toeriste verbeter, wat tot ʼn aansienlike toename in besoekerstal sal lei. Met meer gerieflike vlugopsies en verbeterde dienste wat aan reisigers gebied word, sal Kaapstad ongetwyfeld ʼn nog meer gewilde bestemming word. Dit sal ons plaaslike ekonomie versterk en besighede, entrepreneurs en gemeenskappe regoor die streek bevoordeel.
Terwyl ons die prestasies van die Kaapstad Internasionale Lughawe vier, mag ons nie op ons lourierblare rus nie. Deur lugspasie deur uitbreiding aan te spreek, toon jy direk jou toewyding tot groei, ontwikkeling en veiligheid.
