ʼn Brief aan die juffrou by Laerskool Schweizer-Reneke

Aan Elana Barkhuizen

My liewe vriendin,

Die foto waaroor die herrie woed en waarop gesien kan word hoe gr. 1’s blykbaar volgens hul ras geskei is. Foto: Twitter

Ek is die mamma wat vir drie jaar in ʼn ry ʼn eerstedag gr. R-maatjie by jou kom aflaai het. Ek gaan erken: die eerste keer – Januarie 2017 – was vir my moeilik, ek het gehuil soos enige nuwe mamma met ʼn klein dogtertjie maar doen.

Ek was hartseer en bang en het nie geweet wat om te verwag van die grootskool nie. Maar Januarie 2018 was ons weer daar, vuur en vlam, geen trane, all smiles, want ek weet in wie se hande ek my kind los. Die dag van 9 Januarie 2019, absolute blydskap… Tot die bom bars!

Ek het jou leer ken as ʼn uitmuntende onderwyseres in 2013, iemand wat baie sterk en liefdevol is. ʼn Juffrou wat 210% van haarself gee vir ander mense se kinders. Wit, bruin en swart kinders. Daar is elke jaar kinders wat nie een woord Afrikaans of Engels verstaan nie, maar wat met ope arms verwelkom word. In jou klas, in jou daaglikse roetine en in jou lewe.

Hulle word jou eie kinders. Jy weet presies wie se tas, wie se baadjie, wie se kosblik en selfs kouse is wie s’n. ʼn Meer georganiseerde mens as jy ken ek nie. Elana, hoeveel keer het jy nie al uit jou eie sak vir wit, bruin en swart kinders ʼn broodjie gekoop, want hulle mamma het vergeet om geld in te pak nie? Ek weet… ek was daar. Elana, hoeveel aande het jy gesit en lesplanne uitwerk om kinders te akkommodeer wat nog die taal aanleer? Ek weet… ek was soms daar.

Elana, hoeveel drukkies het jy al uitgedeel aan wit, bruin en swart kinders, want hulle is net kinders… ek sien dit elke dag! Elke kind (ongeag agtergrond, ras of geslag) word met liefde hanteer, elke kind het ʼn spesiale plekkie in jou hart. Dit word jou eie kind… elke onderwyser met ʼn hart verstaan dit.

Ek as ouer staan agter jou, ek weet wat in Schweizer-Reneke se gr. R-klas aangaan, ek spekuleer nie. Ek sien dit en ek het die feite. Klein kindertjies draai nie doekies om nie, hulle praat die waarheid. En uit die mond van my suigeling: “Ek gaan nie meer skool toe gaan as my juffrou nie meer gaan nie”.

Nog ʼn foto wat op dieselfde dag in die klas geneem is waar gesien kan word hoe swart en wit leerders by mekaar sit. Foto: Twitter

Die ouer wat so ʼn bohaai opgeskop het, jy het nie ʼn halwe idee watter uitmuntende onderwyseres jy ʼn onreg aangedoen het nie. Jy het nie ʼn idee hoe dit vandag gevoel het toe ek my gr. 2-dogtertjie moes gaan soek het nie. Jy het nie ʼn idee nie… jy het 300 kinders se lewens in gedrang gebring en 22 onderwysers se lewe sal nooit weer dieselfde wees nie. Laerskool Schweizer-Reneke sal nooit weer dieselfde wees nie.

Ons eens liefdevolle tweede huis vir ons kinders voel “afskuwelik” om ons kinders daarheen te stuur. Manne met rooi hemde en swart hoedjies het probeer om oor die palissades te klim om ons kinders leed aan te doen. ʼn Man met ʼn kakiehemp sal nooit ooit oor jou kind se skoolheining klim om jou kind leed aan te doen nie. Nooit ooit sal hulle jou kind se skool wil afbrand nie. Jy het nie ʼn idee nie…

Vandag was chaos… mammas het gehuil, kinders het gehuil, kinders is getraumatiseerd. Daar was joernaliste en kameras. Oral! Alle hekke is geblok deur mense wat wil kwaaddoen, maar hulle wys dit nie op die nuus nie. Ouers kon nie in of uit by enige ingang nie. Hoe kan ons weer ons kinders met geruste harte skool toe stuur? Jy wat ʼn bohaai opgeskop het oor iets onbenulligs, oor jou eie onsekerhede is jy vandag die skuldige. Nie juffrou Elana Barkhuizen nie.

Het jy enige idee hoe lank het ek gisternag gesit en foto’s block en report van my kind op publieke platforms? Nee, jy het nie! Jy het nie ʼn idee waardeur elke ouer gister is nie.

Laerskool Schweizer-Reneke het fantastiese leerlinge, want hulle het uitstekende onderwysers. Onderwysers wat onderrig in elke sin van die woord. Nie ʼn 7 tot 2 jop nie (o, ja, en as jy daardie ure bymekaartel kom jy by ʼn 7 uur-werkdag uit en moenie vergeet van sport en ander buitemuurse aktiwiteite nie). Onderwysers wat hart en siel insit- elke dag, elke oomblik.

Ek sien die foto wat in die media versprei word en my hart word seer, want ek en elke ander ouer en onderwyser werk baie hard om ons terrein mooi te hou. Ons verf mure en plant bome, ons plant groentetuine en blomtuine en maak kleedkamergordyne, ons verf kombuiskaste en ons bou paadjies: ALLES UIT ONS EIE SAKKE! Ons is trots op ons terrein! Ek raak hartseer, want ek kan nie help om te wonder hoe die gr. R-klasse oor vyf jaar van nou af gaan lyk nie.

Juffrou Elana Barkhuizen, jy is sterk, jy is ʼn vriendin duisend, jy het baie mense wat agter jou staan. Wees dapper en braaf. Die pad kan dalk nog moeiliker raak. Maar jy is tot alles in staat deur Hom wat jou die krag gee.

Groete en liefde,

Mamma

Hierdie rubriek is ʼn lesersbrief wat op Maroela Media se webwerf gepubliseer is. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Só sê die lesers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

158 Kommentare

jongste oudste gewildste
mathilda

Wat ‘n pragtige brief !! My hart gaan uit na die juf wat deur die hel gesit word deur iets wat heeltamal uit verabnd geruk is. Sterkte aan al die kinders wat deur die oenigheid moet gaan

Corné Bester

Sosiale media raak al hoe gevaarliker by die dag, deur mense wat nie die feite ken nie en net hulle eie propaganda wil bevorder. Hulle het geen idee hoeveel skade hulle aanrig terwyl hulle selfvoldaan op hul mishoop sit nie. Sterkte

Rooikop

Pragtige brief aan die onderwyseres !!!!!

Al die drama deur n ouer wat nie n clue het wat aangaan by die skool nie en onnodige
moeilikheid veroorsaak het ……………..

San

My hart huil vir die juffrou en die hele skoolfamilie. God slaap nie. Pragtige skrywe.

Rudi

Nog ‘n tragiese verkragting van menseregte deur die regering. Gebasseer op die metadata van die verskeie foto’s word duidelik bewys dat hierdie ‘n doelbewuste rasistiese aanval , sonder gronde, was op die skool en die onderwyser. Vat die ouer wat gekla het hof toe en laat hulle boet vir die ongelooflike emosionele skade wat hulle berokken het. Laat die minister ook ‘n formele apologie doen om te erken dat hulle ook net die politieke narratief bejaag het in plaas van om dit op ‘n proffesionele manier te ondersoek. Laastens laat die dept ovoeding ‘n reuse boete betaal aan die skool… Lees meer »