Afrikaners moet brûe bou

Kongresgangers by AfriForum se beraad op Buffelspoort. (Foto: AfriForum)

Die demografiese werklikheid in die land is dat Afrikaners yl versprei oor groot gebiede is en tussen ander kultuurgroepe bly.

Vir vreedsame naasbestaan is dit noodsaaklik dat die verskillende kultuurgroepe wedersydse begrip en respek vir mekaar moet hê. Om dié rede is AfriForum aktief betrokke by gesamentlike projekte met ander gemeenskappe waar die fokus op gedeelde sake en nie verskille tussen mekaar is nie, sê Barend Uys, hoof van navorsing by die organisasie.

“Ons kan baie leer by ons voorouers wat ook geweet het dat om in die land te oorleef goeie verhoudinge met ander kultuurgemeenskappe gehandhaaf moet word.”

Uys sê omdat Afrikaners respek vir hulself het, kan hulle ook die regte van ander gemeenskappe erken en respekteer. As ons vir moedertaalonderrig en die beskerming van eiendomsreg vra, moet ons dit ook vir ander gemeenskappe vra.

Volgens Uys reik baie ander gemeenskappe reeds uit na AfriForum “omdat hulle weet ons is Afrikaners en dat ons suksesvol is. Ons moet ander gemeenskappe help om hulself te help. In ons verhouding met ander gemeenskappe is daar nie plek vir paternalisme of om nuwe afhanklikheid te skep nie.”

Hy meen vir ’n beter toekoms is dit ook noodsaaklik dat die geskiedenis genormaliseer moet word. “Die meesterverhaal wat voorgehou word dat wit mense skurke en swart mense slagoffers is, moet afgebreek word.”

Adv. Gerrie Nel Donderdag gedurende ‘n mediakonferensie. (Foto: Verskaf)

Adv. Gerrie Nel, hoof van AfriForum se privaatvervolgingseenheid, het verduidelik hoe die eenheid se werksaamhede inmekaar steek om die doel van geregtigheid en gelykheid voor die reg te bevorder.

“Die strafregstelsel het verval en ons het ’n onbevoegde polities gemotiveerde regbank. Daarom het dit nodig geword om ’n alternatiewe vervolgingsgesag te skep.”

Hy het verwys na die talle sake waarby die eenheid betrokke is wat onder meer daarop gemik is om mense teen magsmisbruik te beskerm. Die eenheid is onder meer tans besig met sake teen hoëprofielpersone asook sake van verkragting en kindermishandeling wat daarop gemik is om die regte van vroue en kinders te beskerm.

Die privaatvervolgingseenheid was in 2017 by 488 sake betrokke. In 2018 was dit 547 en in 2020 altesaam 1 289 sake. “Al hoe meer mense het beskerming nodig weens die verval van die regstelsel en die eenheid kry al hoe meer navrae van mense wat ons hulp nodig het. Ons het baie uitdagings, maar ons sal voortgaan met vervolging omdat selektiewe vervolging nie geduld kan word nie.”

Corné Cronjé, bestuurder van gemeenskapsake by AfriForum, het die organisasie se ankergemeenskapstrategie verduidelik wat daarop fokus om ankerdorpe sterk te maak gegewe die vinnige agteruitgang en verval in die land. Gemeenskappe word bygestaan met volhoubare bestuursmodelle soos die Pionier-dienstemaatskappy wat gestig is om munisipale dienste van uitmuntende gehalte te lewer daar waar munisipaliteite in gebreke bly om dit te doen.

Dit is ’n selfbestuurmodel om byvoorbeeld water- en rioolnetwerke weer funksioneel te kry en te hou. Op die oomblik word gekyk na modelle hoe die geld wat aan die opknapping van infrastruktuur bestee word weer van die staat verhaal kan word. Tans gebruik AfriForum litigasie om munisipaliteite te dwing om te betaal vir die werk wat hulle nie gedoen het nie en in ander gevalle word ooreenkomste met munisipaliteite gesluit wat ooreenkom om te betaal waar AfriForum kundiges aanstel om die werk te doen.

 

Hierdie plasing is deur ’n onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
fransdutoit3

Al brûe wat gebou moet word is by die grensposte van ‘n onafhanklike Wes Kaap..

Dries

Mooi Artikel Alet. Doen so voort. Afriforum se edele en onbaatsugtige werk moet wyd verkondig word. Dankie

Buck

Poep teen donderweer. Die bietjie wit afrikaners kan onmoontlik nie altyd die res bly dra nie. Almal sal moet wil saamwerk. En dit is waar die prebleem le. Te veel wil net handhou

H.A.

Wil en sal nie n anc slaaf wees nie.

H.A.

Moet my nie breinzpoel nie.