Foto’s: ‘Ongemaklike’ fotosessie laat mense skater

José Gerber en Michelle van Biljon het internetgebruikers gaande met hulle ‘ongemaklike’ fotosessie. (Foto: Lilly Leigh Photography)

Toe José Gerber en Michelle van Biljon van Pretoria onlangs ʼn skreeusnaakse fotosessie op Facebook gedeel het, sou hulle nie kon raai watter soort reaksie dit van internetgebruikers tot gevolg sou hê nie.

Gerber (26) en Van Biljon (25) se fotosessie, waarin hulle in ongemaklike posisies poseer terwyl hulle in klere uit die tagtigerjare geklee is, is duisende kere op Facebook gedeel.

Talle Facebook-gebruikers het ook kommentaar gelewer oor die paartjie se sin vir humor. “Ek sou nie my lag kon inhou nie,” skryf ene Charmaine Tait, terwyl talle ander mekaar onder die plasing aangemoedig het om dieselfde soort fotosessie te beproef.

Van Biljon, ʼn maatskaplike werker, vertel aan Maroela Media dat sy en haar kêrel al die afgelope vyf jaar ʼn paartjie is en dat hulle nog nooit vantevore saam vir die kameras geposeer het nie.

“Ons is nie regtig die fotosessie-tipe mense nie. Ek het ʼn soortgelyke fotosessie op Instagram gesien nadat my jonger sussie dit vir my aangestuur het. Ek en José het gedink dit is baie snaaks en dit het ons laat dink aan ʼn toneel uit een van ons gunsteling-flieks, Masterminds.”

Toe Van Biljon weer haar oë uitvee, het Gerber by sy niggie, die fotograaf Lee-Anne Lilly Nel van Lilly Leigh Photography, aangeklop om dieselfde soort sessie met hom en Van Biljon te doen.

José Gerber en Michelle van Biljon het internetgebruikers gaande met hulle ‘ongemaklike’ fotosessie. (Foto: Lilly Leigh Photography)

Van Biljon, ʼn bok vir sports, het ingestem om die fotosessie te doen en het saam met haar vriendin, eienaar van die tweedehandse klerewinkel Rags Reloved, aan hulle uitrustings beplan.

“Nóg ek nóg José besit werklik sulke klere, so ek moes ʼn plan maak dat ons darem by die tema inpas.”

Sy vertel laggend dat hulle nie verwag het dat die fotosessie soveel mense sou vermaak nie. “Ons het gedink ons vriendekring sal dit geniet, want hulle deel dieselfde sin vir humor as ons. Ons is ʼn ‘grappige’ paartjie en neem nie die lewe te ernstig op nie.”

Van Biljon bieg dit was nie deurgaans maklik om ʼn veraf uitdrukking op die foto’s te hou nie. “Ons het ons ná elke foto eers pap gelag.”

Die fotosessie het in ʼn parkie in Queenswood, Pretoria, plaasgevind. “Daar was net een ander paartjie en ʼn boemelaar in die parkie wat ons baie snaaks aangekyk het,” sê sy laggend.