Veearts maak 4-jarige se hart bly na speelhond ‘siek’ raak

Lemieke en Marshall kom by die veearts aan. Foto: Verskaf

ʼn Veearts van Amanzimtoti het uit haar pad gegaan om ʼn vierjarige dogtertjie wat baie ongelukkig was aangesien haar speelgoedhond siek was, se hart weer bly te maak.

Lemieke le Roux het Sondag vir haar ma begin sê dat haar gunstelingspeelding, Marshall, ʼn karakter uit die kinderstorie Paw Patrol, siek is.

“Dit is nie die eerste keer wat dit gebeur het nie. Die vorige keer was dit met ʼn perdjie, en sy wou hom óók graag veearts toe vat, maar sy het later daarvan vergeet en ons hoef dit nie te gedoen het nie. Maar met Marshall het sy aangedring daarop dat hy dokter toe moet gaan,” het Amanda le Roux, Lemieke se ma, aan Maroela Media gesê.

Lemieke het vir haar ma gesê dat Marshall se maag seer is en dat hy nie lekker voel nie. Nadat Le Roux besef het dit gaan nie oorwaai nie, het sy op ʼn gemeenskapsgroep op Facebook gevra of daar iemand is wat haar kan help.

Die veearts behandel vir Marshall. Foto: Verskaf

“Ek het aanvanklik gehoop dat ek iemand kan oortuig om te maak of hulle ʼn veearts is, maar ek het nooit gedink ʼn regte veearts sal na vore kom om te help nie,” het Le Roux gesê.

Dr. Tammy Talbot van Seadone Veterinary Clinic het aangebied dat Le Roux vir Lemieke na haar toe bring sodat sy na Marshall kan kyk.

“Toe ek vir Lemieke Dinsdag by die skool gaan oplaai, was haar eerste woorde aan my: ‘Gaan ons nou dokter toe met Marshall?’. Sy was verskriklik opgewonde om te gaan.”

Volgens Le Roux was die veearts uiters professioneel en het sy vir Lemieke soos ʼn regte kliënt laat voel wat ʼn regte dier vir ʼn ondersoek inbring.

Die veearts behandel vir Marshall terwyl Lemieke toekyk. Foto: Verskaf

“Hulle het vir Lemieke ʼn vervoerkrat gebring waarin sy vir Marshall van die motor af in die spreekkamer kon indra. Lemieke het self al die vrae beantwoord en vorms ingevul.”

Talbot het vir Lemieke gevra hoe oud Marshall is, wat met hom fout is, hoe lank sy hom al het en of hy nog water drink en sy kos eet. Lemieke het alles beantwoord en hulle het met die ondersoek voortgegaan.

“Die veearts het haar stetoskoop aangesit en na sy hart en sy longe geluister. Sy het ook ʼn koorspen in sy oor gedruk om sy koors te toets en het na sy ogies gekyk. Sy het deurlopend vir Lemieke verduidelik wat sy doen en hoekom dit belangrik is, en Lemieke het aandagtig geluister.”

Talbot het toe vir Marshall twee inspuitings gegee terwyl Lemieke hom op die bed vasgehou het.

Lemieke bedank die veearts nadat sy Marshall behandel het. Foto: Verskaf

“Dit was vir my so wonderlik, want sy het twee splinternuwe inspuitings en twee nuwe naalde gebruik om dit te doen. Sy was uiters professioneel en het heeltyd in karakter gebly, dit was wonderlik!”

Talbot het gesê dit was vir haar lekker om deel te hê daaraan om dié meisie se hart gelukkig te maak.

“Ek is ook ʼn ma, so ek weet presies in watter situasie dié ma was. Die feit dat so ʼn klein meisie so baie entoesiasme gewys het, was vir my spesiaal. Dit het my laat dink aan myself toe ek klein was. So as ek iets kan doen om enige klein seuntjie of dogtertjie te inspireer, dan sal ek dit doen,” het sy gesê.

“Dit was eintlik baie lekker om Lemieke se kommentaar en vrae te hoor. Dit was lekker om te sien dat ek ʼn rol daarin kon speel om haar hart bly te maak.”

Le Roux het gesê dit was vir haar baie spesiaal dat iemand soos ʼn veearts die tyd sal neem om soveel moeite vir ʼn klein kindjie te doen.

“Almal by die kliniek het vir Lemieke laat spesiaal voel en asof sy ʼn regte kliënt is. Dit gaan my verstand te bowe. Ek wil net hê mense moet besef daar is nog goeie mense daar buite, wat omgee oor kinders se drome en wat kinders belangrik ag om hulle tyd aan af te staan. Dit is amazing,” het sy gesê.

Le Roux het gesê Marshall sterk tans tuis aan. “Lemieke sê hy voel al beter, maar hy is nog nie heeltemal gesond nie. Maar sy is tevrede want die veearts het vir haar gesê dat die inspuiting ʼn paar dae kan neem om te werk.”