Argieffoto (Foto: Joel Muniz/Unsplash)
“Vertrou op die Here; laat Hý hom dan red! Laat die Here hom verlos as Hy hom dan so liefhet!” (Psalm 22:9)
Skrifgedeelte
Psalm 22:9 (NLV)
Oordenking
Dit gaan sleg met Dawid, hy word gespot, verag – verstoot. Dis vir hom bitter omdat hy wéét dat God hom kan red, maar dit gebeur nie. Sy vyande vra: Waar is jou God nou? Dawid pleit dat God Hom aan die hele wêreld sal bewys, maar beleef die teenoorgestelde.
As gelowiges in ’n ongelowige wêreld word ons ook soms verwerp of uitgesluit. Ons kan selfs spot beleef. Dis veral erg as mense vra: Nou maar waar is God? Dis moeilik om God aan mense te bewys wat wil sien voor hulle sal glo, want die Bybel sê dit werk presies andersom. Jy kan egter wel deur jou woorde en dade wys waar jou God is: lewend in jou hart.
Gebed
Vader, maak my ’n lewende getuie van u goedheid en krag! Amen.
- Hierdie oordenking verskyn in Mini-Oordenkings: Hoop vir elke dag deur Jimi le Roux. Dit word goedgunstiglik deur die Christelike Uitgewersmaatskappy/CUM verskaf.
Amen….dankie Here ….wat U van my dink maak saak!
Baie jare gelede het iemand vir my gesê dat hy net glo wat hy kan sien. Ek het ‘n elektriese koord in die muur geprop, en hom uitgedaag om aan die oop kant te raak. Toe hy terugdeins en sê dat daar elektrisiteit in is, het ek hom gevra om dit te wys. Want hy sien dit nie, maar hy glo dit.