Argieffoto (Foto: Aperture Vintage/ Unsplash)
“Wees waaksaam! Staan vas in wat julle glo! Wees moedig! Wees sterk! Alles wat julle doen, moet in liefde geskied.” (1 Korintiërs 16:13-14)
Skrifgedeelte
1 Korintiërs 16:13-14 (NLV)
Oordenking
Verbeel ek my, of is mense vandag baie selfsugtig? Om nie eens te praat van haat, agterdog en vrees nie. Het wêreldse hoofopskrifte nou ook Christene se hoofopskrifte geword? Volg ons die voorbeeld van die Fariseërs wat net goeie dinge sal doen vir dié wat goeie dinge aan ons doen en om ons vyande te haat? Volg ons Jesus solank dit vir ons gerieflik is?
Ons moet hierdie bose kringloop verbreek. Ons moet Romeine 12 se raad toepas deur goedheid aan ons vyande te bewys. Ons moet woede met goedheid beantwoord. Kom ons bid dat die Here ons sal leer wat dit beteken om Hom te volg. God se pad is nie net die pad kerk toe op ʼn Sondag nie. Kom ons laat die Heilige Gees toe om ons vry te maak van haat en agterdog.
Probeer om ten minste een persoon se lewe vandag beter te maak, met ʼn teksboodskap, ʼn oproep of dalk ʼn vinnige besoek. Dan sal ons eie beker oorloop. Laat Jesus se liefde toe om soos lewende water deur jou te vloei. Ons kan in Jesus se Naam vrykom van selfsug.
- Hierdie oordenking verskyn in Mini-oordenkings: Oomblikke van hoop deur Stephan Joubert. Dit word goedgunstiglik deur die Christelike Uitgewersmaatskappy/CUM verskaf.
