Foto: pixabay.com
Die engel het geantwoord: “Die Heilige Gees sal oor jou kom en die Allerhoogste sal jou toevou. Daarom sal die kind wat gebore word, heilig en die Seun van God genoem word.” (Lukas 1:35)
Kan jy dink hoe verstote en selfs skaam Maria dalk was in die tyd wat sy as ongetroude vrou swanger geraak het met Jesus. Sy was nie net die draer van ’n buite-egtelike kind nie, maar moes ook verklaar dat sy swanger geraak het sonder dat sy en Josef by mekaar geslaap het. Vir enige buitestander klink dit darem maar te dik vir ’n daalder dat die Gees van God haar kon swanger maak.
Maar ook hierdie vrou laat God nie aan haar eie genade oor nie. Hy gee aan haar ’n vriendin, Elisabet, wat haar vrouehart verstaan en ’n man, Josef, wat ondanks die “skande” getrou aan sy verloofde bly.
God sién mense wat, om watter rede ook al, vir ander mense wil wegkruip. Hy verstaan die harte van mense wat skaam-skaam wonder wat ander van hulle dink. En Hy omvou ook húlle met groot deernis en beskerming.
God verstaan jou diepste gedagtes, vrese en onsekerheid. Gee dit maar net weer vandag sonder skroom vir Hom.
Vou my asseblief toe, Allerhoogste.
Dankie Here U is die Weg en die Lewe tot in alle ewigheid…Amen
Amen
Here dankie dat U niemand verstoot nie