Die hemele verkondig die heerlikheid van God. Die uitspansel getuig van die werk van sy hande. Die een dag vertel vir die ander dag; die een nag vir die volgende nag. Hulle praat sonder woord of klank, geluidloos is hulle stem; hulle boodskap gaan uit oor die hele wêreld, hulle woorde tot die uiterste van die aarde. (Psalm 19:2-5)
Ons Skepper is ’n God van ontwerp, kleur, organisasie, skoonheid, heerlikheid en orde. Die suiwerste voorbeeld van vakmanskap en artistieke vaardigheid word gevind in God se skepping van die heelal.
Kreatiwiteit is die uitvloeisel van die hart en gedagtes van iemand wat met die goeie dinge van God gevul is. Indien jy ’n bietjie inspirasie en motivering kortkom, probeer jou hart en gedagtes vul met die kreatiewe wonders van God se skepping. Kyk hoe dit jou inspireer om nuwe en vars maniere te vind om jouself uit te druk.
Hoe kan God se vakmanskap in die natuur jou eie kreatiwiteit aanmoedig?