Resep-video: Kaneelsuikersnye

Kaneelsuikersnye (Foto: Janie Monsieur/Maroela Media)

Stroopsoet gebakte kaneelsuikersnye met ʼn hemelse versiering.

Lewer 4-6 porsies

Bestanddele

• 1 witbrood
• botter
• ½ k klewerige bruinsuiker
• 1 e kaneel
• 3 eiers
• ¼ k melk
• 1 k room
• 1 t vanieljegeursel

VERSIERSEL

• 1 k versiersuiker
• 1 e melk
• 1 t vanieljegeursel
• 2 e botter, gesmelt

Metode

1. Sny die brood op en sny die korsies af. Smeer elke sny met dik botter.
2. Meng klewerige bruinsuiker en kaneel saam en verdeel dit gelyk tussen al die snye brood. Skep lepelsvol op elke sny brood en druk plat met jou hande.
3. Stapel die snye op mekaar en plaas dit in ʼn pannetjie sodat dit knus is. (Sien video.)
4. Meng eiers, melk, room en vanieljegeursel saam in en giet dit oor die brood in die pan. Laat dit vir 5 minute staan en bak dan vir 40 minute by 180 °C.  Laat effens afkoel voor versiersel opgesit word.

VERSIERSEL

5. Meng al die bestanddele saam om ʼn loperige versiersel te maak. Drup die versiersel oor die kaneelsuikersnye en geniet.