Hierdie heerlike noedelsaai is ʼn perfekte kosblikgereg vir die dag wanneer jy nie in die bui is vir toebroodjies nie.
Genoeg vir 4 porsies.
Bestanddele
- 100 g klein durumkoring-skuldnoedels, rou
- 150 ml kookwater
- 1 hoenderaftrekselblokkie
- 2 swart peperkorrels
- 2 heel kruienaeltjies
- 2 lourierblare
- 2 hoenderfilette
- 20 ml ui, geskil, fyngekap
- 1 middelslag groen soetrissie, ontpit, fyngekap
- 1 blik ingemaakte perskeskywe (410 g), gedreineer, in stukkies gesny
- 2 klein rooiskilappels, ontkern, in blokkies gesny
- 125-150 ml lae-olie-slaaisous van keuse (bv. Knorr Light Yoghurt & Honey)
- 30-60 ml vrugteblatjang
- 10 ml matige kerriepoeier
Metode
- Kook die noedels vir 8-10 minute in soutwater tot net gaar, maar nie pap nie. Dreineer en laat afkoel.
- Verhit die water, aftrekselblokkie, peperkorrels, naeltjies en lourierblare saam tot kookpunt. Plaas die hoenderfilette in die kokende aftreksel en prut dit 15-20 minute lank tot sag en gaar. Laat die filette in die aftreksel afkoel.
- Sny die filette in stukkies en voeg dit by die gaar noedels. Voeg die ui, soetrissie, perskestukkies en appel by.
- Meng die slaaisous, blatjang en kerriepoeier en giet dit oor die slaai. Meng liggies deur en verkoel voor bediening.
Bron: Uitpakkos
Uitgewer: Lapa