Daar is min dinge so eg Suid-Afrikaans soos beesstert. Hierdie warm, heerlike vleisgereg is perfek vir familie-kuiers en samesyn.
Bestanddele
- 4 knoffelhuisies, gekneus
- 2 selderystengels, fyngekap
- 2 groot uie, fyngekap
- 2 wortels, in ringe gesny
- 600 g beesstert
- 1 e tiemie
- 1 e pietersielie
- 2 k Old Brown Sherry (OBS)
- 1 k beesvleisaftreksel
- 3 groot aartappels, in blokkies gesny
- sout en varsgemaalde swartpeper na smaak
Metode
- Soteer die knoffel, seldery, uie en wortel in jou drukkoker. Haal dit uit en hou eenkant.
- Bedek die beesstertstukke met ‘n bietjie meel en verbruin dit in die pot.
- Gooi ʼn bietjie OBS in die pot sodra die vleis gekaramelliseer het sodat die stukkies vleis en groente wat op die bodem van die pot gekaramelliseer het, kan loskom.
- Voeg die seldery, wortels, ui en knoffel weer by. Voeg dan die tiemie en pietersielie by asook die res van die sjerrie en beesvleisaftreksel. Voeg laastens die aartappels by.
- Geur met sout en swartpeper. Seël die drukkoker en stel die stoofplaat op ʼn matige tot hoë hitte. Laat die pot vir ʼn uur en ʼn half sy ding doen. As die vleis nog nie sag genoeg is nie, kan jy dit vir nog ʼn halfuur kook.
Bron: Sjef Snoekie laat die potte sing
Uitgewer: Lapa