Resep: Pannekoekies met hoendervulsel

Ligte happies soos hierdie is perfek vir jou volgende piekniekmandjie of gesinsuitstappie.

Lewer 12 tot 16 klein pannekoekies

Bestanddele

Vir die pannekoekies

• 250 ml koekmeel
• 5 ml bakpoeier
• 2 ml sout
• 2 eiers
• 250 ml water
• 100 ml melk
• 20 ml asyn
• 60 ml kookolie
• ekstra kookolie om die pannekoekies te bak

Vir die hoendervulsel

• 2 gaar hoenders, met ʼn vurk gepluis
• 2-3 sprietuie, gekap
• 30 ml rooi soetrissie, ontpit en in klein blokkies gesny
• sout en peper na smaak

Vir die sous

• 100 ml mayonnaise
• 15 ml gekapte agurkie (gherkin)
• 15 ml soetrissiesous (sweet chilli-sous)
• 3 ml gemengde kruie

Metode

1. PANNEKOEKIES: Meng al die bestanddele goed saam en plaas dit in die yskas vir ongeveer 25 minute. Verhit ʼn pan, smeer met olie en vul die pan met die pannekoekmengsel. Bak aan albei kante tot gaar. Hou eenkant.
2. HOENDERVULSEL MET SOUS: Meng eers al die bestanddele vir die hoendervulsel saam en daarna al die bestanddele vir die sous. Meng dan die hoender en die sous goed saam. Skep die vulsel in die pannekoekies, rol die pannekoekies toe en bedien.

Bron: Marilyn kuier en kook
Uitgewer: Lapa