Min dinge sê Kersfees soos ʼn lekker stukkie beestong.
Lewer 6 porsies.
Bestanddele
- 1 beestong
- 15 ml (1 e) bruinsuiker
- 4 swartpeperkorrels
- 3 naeltjies
Rosynesous
- 125 ml (½ k) bruinsuiker
- 5 ml (1 t) mosterdpoeier
- 15 ml (1 e) koekmeel
- 30 ml (2 e) witasyn
- 375 ml (1½ k) water
- 125 ml (½ k) rosyntjies
Metode
- Plaas die tong in ʼn groterige kastrol en bedek dit met water.
- Voeg die bruinsuiker, peper en naeltjies by. Plaas die deksel op en laat prut oor lae hitte vir 2 ure.
- Haal die tong uit en laat dit effens afkoel.
- Trek die vel van die tong af. Sny die tong in dun skywe en pak dit in ʼn oondvaste bak.
Rosynesous
- Gooi die suiker, mosterd en meel in ʼn kastrol en roer goed deur.
- Gebruik ʼn ballonklitser en klits die water stadig by die inhoud in die kastrol sodat dit kan meng en nie klonte vorm nie.
- Roer die asyn by. Verhit stadig en roer af en toe tot die mengsel begin kook. Voeg die rosyne by en kook totdat die sous begin verdik.
- Giet die sous oor die skywe tong, plaas die bak in ʼn voorverhitte oond van 160 °C tot dit deurwarm is, en sit dan voor.
Bron: Onthoukos
Uitgewer: Lapa