As ek terugdink … in die dae voor Toyota, was daar net een hardebaard 4×4. ʼn Gaan-orals-en-doen-alles-4×4 – en dit was die Land Rover Series I en II wat toe later die Defender geword het. Jeeps en Toyota se Land Cruiser het eers later gewild geraak. Die vorige Defender was egter stokoud teen die einde van sy lewensiklus en die wêreld het getreur oor die einde van die Defender.
Baie mense was egter glad nie lief vir die Defender nie en het hom gedoop as “die ongemaklikste voertuig op aarde” terwyl ander weier om in enigiets anders te reis.
Land Rover moes ʼn keuse maak. Bou hulle die volgende Defender presies soos die ou een, of slaan hulle ʼn nuwe rigting in? Ek kan nie sê wat die perfekte oplossing sou wees nie – maar die nuwe Defender is beter as waarmee ek vorendag sou kom.
Ons het al baie tyd met die Defender spandeer. Aanvanklik het ons karavaan gesleep met die fantastiese P400– turbopetrol weergawe. Ek vermoed egter die D240-weergawe gaan meer gewild wees onder Defender-kopers, weens die belofte van beter brandstofverbruik. Land Rover bevestig dat daar, in hierdie stadium, groter aanvraag is vir dieselmodelle as vir die petrolweergawes.
Die ontwerp en binneruim is presies dieselfde soos op die P400-weergawe. Dit is ʼn groot, sewe sitplek sportnutsvoertuig. Die kajuit is duursaam, dog modern. Daar is laaiproppe en USB-poorte vir ʼn vale. Die digitale instrumente en raakskerm is voorwaar modern en werk puik.
Dit is egter onder die kap waar dinge verskil. Die D240-weergawe word aangedryf deur Jaguar Land Rover se 2.0 viersilinderturbodieselenjin. Die masjien bied 177 kW en 500 Nm. 0 – 100 km/h neem ʼn billike 9,1 sekondes, en die D240 sal 188 km/h haal. Die diesel se voordeel bo die petrol is brandstofverbruik. Land Rover beweer 7,7 l/100 km op die diesel en 9,9 l/100 km op die petrol. Ons het tydens ons sleeptog met die P400 nader aan 17 l/100 km gehaal.
Op die pad is enige Defender ʼn fees. Dit is uiters gemaklik en spog met ʼn enorme sleepkapasiteit van 3 500 kg. Weens sy sleepkapasiteit sal ek egter een van twee modelle kies. Die D300- sessilinder diesel waarmee ek nog nie gery het nie, of die P400. Die D240 sal heeltemal die mas opkom, maar die prysverskil tussen hulle is egter piepklein en die D300 sal nóg beter brandstofverbruik bied as die D240 – veral as hy bietjie moet werk.
Land Rover het onlangs pryse bekendgemaak van die lang verwagte Defender 90-kortasafstand. Ek moet bieg dat ʼn Defender 90 D300 S moontlik ʼn plekkie in my droommotorhuis sal vind.
Die reeks lyk nou só:
Land Rover Defender 90 D240 S | 177 kW/500 Nm | 7,6 l/100 km | R1 141 966 |
Land Rover Defender 90 P300 S | 221 kW/400 Nm | 10,1 l/100 km | R1 145 968 |
Land Rover Defender 110 D240 S | 177 kW/500 Nm | 7,7 l/100 km | R1 174 004 |
Land Rover Defender 110 P300 S | 221 kW/400 Nm | 10,2 l/100 km | R1 178 282 |
Land Rover Defender 90 D300 S | 221 kW/650 Nm | 7,6 l/100 km | R1 232 752 |
Land Rover Defender 90 P400 S | 294 kW/550 Nm | 9,9 l/100 km | R1 264 430 |
Land Rover Defender 110 D300 S | 221 kW/650 Nm | 7,6 l/100 km | R1 265 452 |
Land Rover Defender 110 P400 S | 294 kW/550 Nm | 9,9 l/100 km | R1 298 830 |
Land Rover Defender 110 P400e S | 297 kW/640 Nm | 2,8 l/100 km | R1 554 600 |
Die reeks word gedek deur ʼn 5 jaar/100 000 km-waarborg én omvattende instandhoudingsplan.
Ek lys hier slegs die S intree spesifikasievlak. Elke enjin en bakstyl, 90 of 110 is beskikbaar in S, X-Dynamic SE, X-Dynamic HSE, en X.
Die kompetisie lyk só:
Toyota Land Cruiser 76 4.5D-4D V8 LX | 151 kW/ 430 Nm | 11,6 l/100 km | 3 500 kg | 3 jaar/100 000 km waarborg | R859 700 |
Toyota Land Cruiser Prado 2.8GD-6 VX-L | 150 kW/ 500 Nm | 7,9 l/100 km | 3 000 kg | 3 jaar/100 000 km waarborg 9 Dienste diensplan | R1 150 500 |
Nissan Patrol 5.6 V8 LE 4WD | 298 kW/ 560 Nm | 14,4 l/100 km | 3 500 kg | 6 jaar/150 000 km waarborg 3 jaar/ 90 000 km diensplan | R1 571 700 |
Toyota Land Cruiser 200 4.5D-4D V8 VX-R | 195 kW/ 650 Nm | 10,2 l/100 km | 3 500 kg | 3 jaar/100 000 km waarborg 9 Dienste diensplan | R1 606 600 |
Mercedes-Benz G400d | 243 kW/ 700 Nm | 9,6 l/100 km | 3 500 kg | 2 jaar/onbeperkte km waarborg 5 jaar/100 000 km omvattende instandhoudingsplan | R2 892 840 |
Tussen dié mededingers is die Prado waarskynlik die naaste. Die Cruiser 76 is meer ʼn ou Defender mededinger, maar vir 4×4 vernuf is hy nog rateltaai. Die Cruiser 200 word binnekort vervang deur die Cruiser 300. Nissan se Patrol voel al egter baie oud, en vir die G400d se geld kan mens twee Defenders koop. My keuse hier is die Defender en die Prado.
Nee regtig Landrover, het julle dan ‘n ontwerper uit Rusland gekry om die bak te ontwerp, die nuwe model lyk soos ‘n aftreksel van die Lada Niva.
Selfs al gee hulle vir my 1 verniet, ruil ek hom gelykop vir ‘n Toyota.
Voertuie se pryse het heeltemal belaglik geraak. Wat kos dit die eienaar aan R/km op die ou end?