Malema regsverteenwoordigers wil tugverhoor uitstel

Regsverteenwoordigers van die ANC-jeugligaleier, Julius Malema, sal Donderdag versoek dat sy tugverhoor uitgestel word.

Malema is Woensdag in die Limpopo Medikliniek opgeneem waar hy glo vir erge griepsimptome behandel word. Malema se regsverteenwoordiger, adv. Dali Mpofu, sê Malema sal nie die verhoor kan bywoon nie. Mpofu wou egter nie kommentaar lewer op Malema se toestand nie. Daar is vroeër berig dat Malema griepsimptome gehad het toe hy Dinsdag studente by die Universiteit van Limpopo se Turfloop kampus toegespreek het. Malema en vyf van sy kollegas word daarvan aangekla dat hulle die ANC in oneer gebring het en verdeeldheid in die party saai.