ʼn Tiener van Mmakau Village naby Brits in die Noordwes is vermoor, sy vel afgetrek en van sy liggaamsdele verwyder.
“Neo Ramaswe (13) se gesigvel is afgetrek en sy keel, tong en niere is vermoedelik vir muti verwyder,” het kaptein Amanda Funani, woordvoerder vir die polisie in Noordwes, gesê.
Muti is tradisionele Afrika-medisyne.
Ramaswe se liggaam is Sondag in ʼn oop veld opgespoor, maar die polisie het die inligting eers Woensdag aan die media bekendgemaak. “Hy is laas Donderdag gesien toe hy saam met sy vriende sokker gespeel het,” het Funani gesê.
Die polisie is op soek na twee mans wat vermoedelik in sy moord betrokke was, nadat ooggetuies hulle met hom sien praat het. ʼn Moordsaak is geopen.