Mense het tydens die ma en ouma se vorige verskynings voor die hof betoog. Foto: @VioletEyeKZN op Twitter
Die saak teen ʼn ma en dogter wat daarvan beskuldig word dat hulle die kleuter, Jamie Naidoo vermoor het, is in die Chatsworth-landdroshof in KwaZulu-Natal uitgestel, het die Saturday Star berig.
Landdros Busisiwe Lilly Mpungose het Vrydag die saak tot 19 Maart uitgestel vir verdere ondersoek. Die twee word daarvan beskuldig dat hulle Jamie in November in hul huis in Havenside doodgeslaan het.
Mpungose het verlede maand beveel dat Salatchee Venilla Basanich (55) en haar dogter Patricia Kershie Ishwarlal (31) vir ʼn sielkundige ondersoek gestuur moet word by die Fort Napier-hospitaal. Die hof het gehoor dat Ishwarlal in 2001 kopbeserings in ʼn motorongeluk opgedoen het en sy het verminderde beheer oor basiese funksies.
ʼn Verslag wat in 2004 aan die Padongelukkefonds voorgelê is, het bevind dat Ishwarlal kinderlik optree en haar spraakpatrone is ook soortgelyk aan ʼn jong kind sʼn.
Die ma en dogter moet op 19 Maart weer in die hof verskyn.
Lees alle vorige berigte oor Jamie Naidoo op Maroela Media.
