‘Begroting was teleurstellend’

Minister Malusi Gigaba. Foto: Elmond Jiyane, GCIS

Suid-Afrika se begroting wat deur min. Malusi Gigaba aangekondig is, is in vele opsigte teleurstellend en het net onderstreep hoe groot die land se finansiële probleme werklik is.

Só meen Pieter Groenewald, leier van die VF Plus.

Volgens hom het Gigaba nie die geweldige skuldlas van die regering wat deur voormalige pres. Jacob Zuma se administrasie veroorsaak is daadwerklik aangeraak nie.

“Die verwagte groeikoers van 1,5% vir 2018-’19 en 2,2% in 2020 is nie genoeg om die ekonomie sodanig te laat groei dat dit ʼn wesenlike invloed op werkskepping gaan hê nie, veral nie as in gedagte gehou word dat meer as ʼn miljoen mense jaarliks die arbeidsmark betree nie,” het Groenewald gesê.

Om te sê die regering gaan oor die volgende drie jaar R85 miljard spaar, wek wel die regte indruk, maar bloot die rente op regeringskuld beloop tans al R198 miljard per jaar. “Die besparing is dus ʼn druppel aan die emmer,” het Groenewald gesê.

Gigaba het ook geen aanduiding gegee van beplande stappe om besparingsmaatreëls in te stel nie.

“Wat BTW betref, is die VF Plus tevrede dat dit met een persent verhoog is aangesien dit belangrik is dat die land se belastingbasis verbreed word. Die VF Plus het lankal reeds gevra dat BTW verhoog moet word, eerder as buitensporige verhogings van persoonlike belasting.”

Groenewald het gesê daar word tans van sowat 5 miljoen belastingbetalers uit 55 miljoen landsburgers verwag om die belastingjuk alleen te dra. Daar kan tog nie van ʼn sekere groep verwag word om net al meer belasting te betaal nie.

“Stapelvoedsel soos meel, bruinbrood en rys word uitgesluit van BTW en die verhoging sal die heel armstes feitlik nie raak nie. Die bykomende heffing van 52 sent op die brandstofprys moet na regte ook nie bloot in die belastingmandjie beland nie, maar uitsluitlik aangewend word vir die Padongelukkefonds (POF) en die land se paaie-infrastruktuur.”

Laastens het Groenewald bygevoeg: “Wat gratis hoër onderwys betref, is ʼn voorwaarde noodsaaklik dat studente wat wel in aanmerking kom hul akademiese jaar móét slaag, anders sal dit ʼn blote vermorsing van belastingbetalers se geld wees.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Willie

Dis n groot teleurstelling.. as CR erenstig was, sou daar al koppe gewaai het, en instansies verkein word… Hy gana later probeer Hero speel… dink did ietwat strategies van aard

PB

Hoe kan mense sê die verhoging 1% raak nie die arm mense nie. Hul het tog ander behoeftes behalwe bruin brood, meel en rys. Wat in elk geval gaan duurder word met die verhoogde heffing in brandstof.

Jacques Venter

Die arm mense gaan deur hulle nekke betaal, terwyl niks aan Gigaba se kollegas gedoen is nie. Daar is nie aan ministers se oordadige voordele geraak nie

Koos1

En Pieter, die wat nie slaag nie moet die geld terug betaal. In die “Public Financial Management Act” word vrugtelose uitgawes breedvoerig gedek. ‘n Student wat druip, is niks anders as ‘n vrugtelose uitgawe nie, en die wet verplig die staat om die vrugtelose uitgawe te verhaal.
Daar moet nog baie water in die see loop voordat hierdie Zuma malheid kan realiseer.

Alida

Hy homself is terleurstellend en moes NOOIT eers aangestel gewees het nie.