Beslissing oor ou SA vlag: ‘Die Stem is volgende …’

Die Suid-Afrikaanse vlag. (Foto: Wikimedia Commons)

Die besluit van die gelykheidshof dat die vertoon van die ou Suid-Afrikaanse vlag in ʼn sekere konteks op haatspraak neerkom, het hewige reaksie ontlok.

Die beslissing is uit verskeie oorde verwelkom, terwyl talle ander die beslissing betreur.

Adjunk-regter-president Phineas Mojapela het Woensdag bevind die ongegronde vertoon van die ou vlag word nie beskerm onder vryheid van uitdrukking nie. Mojapelo sê die swaai van die vlag is verdelend, pynvol en gaan verder as haatspraak: dit is teistering.

Dít beteken dat die ongegronde tentoonstelling van die vlag, byvoorbeeld by ʼn sportbyeenkoms, verbied word. Die vertoon daarvan word steeds in byvoorbeeld museums en akademiese konteks toegelaat.

Die Nelson Mandela-stigting (NMS) het die aansoek by die gelykheidshof ingedien en die Menseregtekommissie (MRK) was die tweede aansoeker in die saak.

Die EFF het die beslissing oor die “bose vlag” verwelkom. “Ons sê al lankal dat die apartheidsvlag, asook ander apartheidsimbole, moet val. Ons verwelkom die beslissing as ʼn mylpaal en oorwinning vir diegene wat vra dat apartheid- en koloniale simbole in die samelewing verwyder moet word,” het Mbuyiseni Ndlozi, woordvoerder van die EFF, gesê.

“Die apartheid- nasionale volkslied moet in sy vlag se voetspore volg. Die apartheidvlag en sy volkslied behoort aan dieselfde spesie. Dit is twee kante van dieselfde muntstuk. Wanneer wit heerssugtiges die vlag swaai, salueer hulle dit deur ‘Die Stem’ te sing, omdat hulle saamhoort in anti-swart, rassistiese gedrag.”

Die EFF sê ander apartheidstandbeelde, straatname en simbole moet ook tot haatspraak verklaar word.

Die VF Plus het gesê die uitspraak skep ʼn gevaarlike presedent. “Suid-Afrika se howe moet hulle by die reg hou en nie ingetrek word in die moeras van morele oordele nie,” het dr. Corné Mulder, die VF Plus se hoofsweep, gesê.

“Nasiebou is nie om een se wil op ʼn ander af te dwing nie. Dit versoen nie, dit skeur in twee. Dit is al wat hierdie uitspraak gaan bereik.”

Die ANC het die beslissing verwelkom. “Ons stem saam met die hof dat die vertoon van die ou vlag die waardigheid van swart mense beskadig en dat diegene wat dit vertoon doelbewus onderdrukking oor bevryding kies,” het Pule Mabe, ANC-woordvoerder, gesê.

“Die uitspraak is ʼn bevestiging van die ANC se standpunt dat die ou apartheidsvlag en ander apartheidsparafernalia verdelend is en ʼn hunkering na die lelike verlede verteenwoordig. Ons glo enige getrouheid aan apartheidsimbole ondermyn pogings om ʼn nuwe, demokratiese samelewing te bou, gegrond op die waardes van geregtigheid, gelykheid en vryheid.”

Die DA het gesê die demokratiese vlag verteenwoordig alle Suid-Afrikaners en omvat die waardes van eenheid in diversiteit.

“Die apartheidsvlag vorm deel van ons pynlike geskiedenis en moet gebruik word om op te voed en in te lig. ʼn Algehele verbod op die vlag sou toekomstige geslagte ontneem van die land se volle geskiedenis – ʼn geskiedenis wat ons nooit moet vergeet of herhaal nie. Dus is ʼn beperking op sy gebruik vir akademiese navorsing en joernalistieke doeleindes ʼn belangrike deel van die uitspraak,” het Annelie Lotriet, voorsitter van die DA se parlementêre koukus, gesê.

Sy het gesê daar ís diegene wat die ou vlag wil misbruik en terugtrek na ʼn laer van rasse- en kulturele identiteit. “Dit verhinder maatskaplike samehorigheid en ondermyn die demokrasie.”

Die parlementêre portefeuljekomitee oor sport, kuns en kultuur het gesê geen groep behoort meer apartheid en sy simbole te mis nie. “Die verdelende neigings van ʼn handjievol moenie gelykgestel word aan en met Afrikaners nie. Dit is uitsonderings,” het Beauty Dlulane, komiteevoorsitter, gesê.

“Die beslissing versterk die komitee se siening dat ʼn groot aantal Suid-Afrikaners, Afrikaners ingesluit, die waardes van ʼn nuwe Suid-Afrika verwelkom en bereid is om te help.”

Dlulane het gesê Suid-Afrikaners moet ʼn erfenis wat vrede en samehorigheid bevorder, verwelkom.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

102 Kommentare

jongste oudste gewildste
Cherokee

En julle wat DA stem ondersteun die wegdoen daarvan. Julle sal ook die wegdoen van die Stem ondersteun.

Tiaan

Ok so kom ons verbied die Britse vlag ook aangesien ons Afrikaners dood gemaak is deer hulle.
Dit wys jou ons Afrikaners gaan al hoe minder sê in die land hê.
Hulle speel die jammer kry spel. Kom oor dit want ons Afrikaners het.

Piet pompies

Moenie verbaas staan nie! Die JA stem was die fondament vir dit wat nou gebeur. Op watter model Afrika staat was jul JA stem gebasseer?

SOS

Hierdie mense ly selektiewe denke. Solank dit hulle pas en dit terwyl moord en doodslag ‘n alledaagse geword het in hierdie land. Snaaks hoe ons blanke belastingbetalers se geld alles moet probeer reg hou.

Eben

Ek is 100% ten gunste van die verwydering van die Stem-gedeelte uit die landslied (let wel, nie die volkslied nie). Dit was nog altyd vir my ‘n steen des aanstoots dat ‘n gedeelte van die pragtige Stem saam met ‘n verwerplike proteslied gesing word. Ek het ieder geval nog nooit die landslied gesing nie, en staan ook nie op wanneer dit gesing word nie. Laat die Stem ‘n Afrikaner-volkseie lied bly en laat ons dit by alle volksbyeenkomste sing. Die tyd van neerbuig voor die ANC-EFF kommunistiese diktatuur is verby!