Beurtkrag opgeskort

Eskom het Dinsdag aangekondig dat hy nie meer beurtkrag toepas nie.

Volgens die kragvoorsiener was die kragnetwerk vroeër Dinsdagoggend erg onder druk maar het die vraag na elektrisiteit aansienlik afgeneem en dit is nie meer nodig om fase 1-beurtkrag toe te pas nie.

Die kragnetwerk is al sedert Sondag onder druk nadat ʼn eenheid by Koeberg-kragstasie weens ʼn tegniese fout van die netwerk afgehaal is.

Fase 1-beurtkrag maak voorsiening dat tot 1000 MW se kragverbruik gesny word, fase 2 tot 2000 MW en fase 3 maak voorsiening vir die sny van tot 4000 MW se kragverbruik.