DA steun plan om skade in Brackenfell van EFF te verhaal

EFF-lede ruk Vrydag op na die Hoërskool Brackenfell. (Foto: EFF/Twitter)

Die DA sê hy steun die voorneme van die Stad Kaapstad om die skade wat Vrydag gedurende die EFF se betoging buite die Hoërskool Brackenfell in Kaapstad aan munisipale eiendom aangerig is, van dié party te verhaal.

’n Brandweerwa is gedurende die betoging aan die brand gesteek, paaie en verkeersligte is beskadig en ’n stuk veld is afgebrand.

Die vensters van ’n motorhandelaar op die hoek van Paradys- en Ou Paarlweg is gebreek en skade is aan private motors aangerig. Verskeie winkels is geplunder.

Kaapstad beoog om die koste van die skade te bereken en dit dan van die EFF te verhaal.

“Dit is hoog tyd dat die EFF aanspreeklikheid vir hul dade neem,” sê Refiloe Nt’sekhe, DA-woordvoerder.

“Die EFF het niks in Brackenfell verloor nie. Hulle betoog teen sogenaamde rassisme, maar dit was niks anders as ʼn skandelike daad van politieke opportunisme nie.”

Die DA het ook die polisie, die metropolisie en ander wetstoepassingsagentskappe geloof dat hulle die situasie in bedwang probeer hou en saakbeskadiging beperk het.

“Die EFF het egter nie die stad se voorwaardes vir hierdie betoging nagekom nie.

“Terwyl ons almal se regte om te betoog, respekteer, kan dit nie ten koste van die regte van kinders of munisipale eiendom wees nie.”

Nt’sekhe sê die DA gaan ook stappe doen om aandag te gee aan wysigings aan tersaaklike wetgewing sodat die polisie in soortgelyke situasies beter bemagtig kan word.

Maroela Media het vroeër berig agt betogers is in hegtenis geneem nadat honderde lede van die EFF Vrydag weer na die skool opgeruk het. ’n Waterkanon en skokgranate is onder meer ingespan om die groot skare weg van die skool te keer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Grant

Sterkte daarmee goeie plan maar hulle sal waarskynlik se dit was hulle lede nie of so iets. En hulle wou kamstig eiendom van die boere beskerm in Senekal.

SomeOne

8 betogers kon nie al die skade aangerig het nie terwyl daar honderde intelligentloses amok gemaak het

Mariana

Nee wat hulle sal nie betaal nie. Hulle is die onaantasbares. Hulle het die goedkeuring van die ANC en die amok wat hulle maak is mos niks. Hulle het een doel voor oë en dit is om te breek en te brand, die sogenaamde rassisme hierdie geval is net verskoning vir hul dade. Hulle leier is obsessief oor witmense en hoe om ontslae te raak van ons.

Tanja

Die regter wat die EFF toestemming gegee het moet ook opdok

Renata

Ek hoop die regter wat toestemming gegee het vir die “vreedsame betoging” wat deur EFF sou plaasvind word ook oor die vingers getik. Hy het van meet af geweet geen betoging deur EFF lede is vreedsaam nie. Nou moet daar weereens opgeruim en herstel word na die spul breinlose wetters als vernietig het. Vergelyk die skade wat nou aangerig is met Senekal se skade en vergelyk die saak benadering van beide gevalle. Weereens n helse groot verskil: los die breinloses op waarskuwing, maar sluit die wit boer toe!!