‘Gʼn manier’ dat Len Cloete oor voorval kan praat

Len Cloete is in November verlede jaar deur polisie in die kop geskiet. (Foto: Facebook / Len Cloete)

Byna ʼn jaar nadat Len Cloete by ʼn gastehuis in Muldersdrift deur ʼn polisiebeampte in die kop geskiet is, kan hy nog steeds nie praat nie.

Hy kan glo sy oë oop en toe maak, sy een hand effens beweeg, registreer as sy vrou, Chantal, met hom praat en hy kan glimlag. Dis al. Cloete is tans nog van voltydse sorg – wat hy tuis ontvang – afhanklik.

Die private speurder Mike Bolhuis en kol. Luke Enslin, ook ʼn lid van Bolhuis se span, het Maandag aan Maroela Media gesê totdat Cloete nie self sy kant van die saak kan stel nie, sal die onderskeie ondersoeke na die voorval nie werklik afgehandel kan word nie.

Enslin sê daar is in dié stadium “geen manier” dat Cloete sy saak sal kan stel of in ʼn hof kan getuig nie.

Intussen sloer die polisie sowel as die onafhanklike ondersoekdirektoraat (Opod) se strafregtelike sake na die voorval, al is groot gedeeltes daarvan reeds gedoen.

Sou daar besluit word dat Cloete waarskynlik nooit sal kan getuig nie, sal mediese verslae voor ʼn aanklaer gebring word, om te besluit of die sake wel sonder Cloete kan voortgaan al dan nie.

Dit blyk egter onwaarskynlik te wees dat dit wel sonder sy getuienis sal kan aangaan.

Voorval ‘uiters traumaties’ vir gesin

Bolhuis sê hy het baie respek vir Cloete se vrou wat hom en drie van hul kinders versorg. Hy meen die voorval was vir die Cloete-gesin uiters traumaties en dat hulle steeds besig is om dit verwerk.

“Baie vriende het onttrek omdat hulle dit nie kan hanteer nie om hom so te sien.

“Met die kinders gaan dit onder omstandighede goed, hulle werk ook nog deur die trauma. Sy gesin is baie lief vir hom en kyk mooi na hom.”

Bolhuis en Chantal het Maandag ʼn openhartige gesprek met Jacaranda FM oor die ondersoek en Len se toestand gevoer.

Chantal het gesê dat haar man baie goeie sorg ontvang en “gelukkig” is.

Cloete se gewig het ná die voorval van 120 kg tot 57 kg afgeneem, maar hy weeg tans 87 kg. Chantal sê sy is die enigste persoon wie se rug Cloete vryf wanneer hy ʼn drukkie kry.

Oor of mense voor die skietery geïntimideer was deur Cloete en sy grootte en voorkoms sê Chantal dat mense mal was oor Len en gereeld saam met hom wou foto’s neem. Sy beskryf haar man as uniek – ʼn sosiale mens wat daarvan gehou het om mense te bederf.

“As jy vir Len geken het, het jy ʼn beste vriend gehad.”

Bolhuis doen ʼn beroep op sosialemediagebruikers om nie allerhande uitlatings op sosiale media te maak oor wat die betrokke aand by die gastehuis afgespeel het, of wie die skuld daarvoor moet dra nie.

“Dra die gesin eerder in gebed op.

“Dit is ook after all ʼn wonderwerk dat hy oorleef het. Mense moet hulself daarvan weerhou om op sosiale media te skinder en snert te praat. Dis onaanvaarbaar en onnodig. Bid vir hul familie om hierdeur te kom. Daar is boonop kinders ter sprake.”

Bolhuis meen voorts daar is ʼn “vanselfsprekende waarheid” wat reeds ondersoek is.

“Jy het verdagtes in ʼn saak, en jy kan nie ʼn verdagte se saak namens hom stel nie. In dié geval kan die polisie hul kant verduidelik en ons kan ons ondersoek aan die polisie verduidelik, maar Len, wat die spilpunt van hierdie ondersoek is, kan nie ʼn woord sê nie.

“Hy kan dus nie sê wat daai aand gebeur het nie. Dis ʼn moeilike beslissing wat in die staat se hande lê.”

Bolhuis meen in ieder geval sal daar gekyk moet word of daar enige nalatigheid of onverantwoordelikheid ter sprake was.

“As jy Len nie in die prentjie het nie, het jy nie die persoon wat benadeel is, se getuienis nie. Dit maak die saak baie moeiliker.”

Verskeie ondersoeke is tans aan die gang en moontlik siviele eise kan ook nog ingestel word.