(Foto verskaf deur die Valke)
Vyf persone het Donderdag in die landdroshof in Kempton Park verskyn in verband met die onwettige smokkelary van dwelmmiddels na Australië via die OR Tambo- internasionale lughawe.
Stanley Nkuna (33), Justice Mahloma (44), Madimetje Mahangwhane (41), Thulani Sibiya (31) en Fuba Mahlangu (40) is al sedert 15 November 2023 in aanhouding toe hulle deur die Valke se eenheid in Gauteng, wat ernstige georganiseerde misdaad ondersoek, in hegtenis geneem is.
“Die vyf beskuldigdes was na bewering betrokke om dwelmmiddels ter waarde van R500 miljoen na Australië uit te smokkel. ‘n Besending van vyf sakke dwelmmiddels van 100 kg elk is tydens ‘n dwelmklopjag op 7 Oktober 2023 in Australië gevind,” sê kol. Katlego Mogale, woordvoerder van die direktoraat vir prioriteitsmisdaadondersoeke (die Valke).
Hulle het reeds verskeie kere in die hof verskyn vir hul aansoeke om borgtog.
“Tydens die hofverrigtinge het die toesighoudende beampte aangedui dat die beskuldigdes nie deursigtig was wat betref getuienis om die hof te ondersteun om ʼn ingeligte besluit rondom hul borgtog te maak nie.”
Beskuldigde 1, 4 en 5 se aansoeke om borgtog is afgekeur, aangesien dit nie in die belang van geregtigheid sal wees nie, aangesien hulle versuim het om buitengewone omstandigheidsgetuienis in te dien vir hul aansoeke om borgtog, sê Mogale. Beskuldigde 2 en 3 is vrygelaat op borgtog van R15 000 elk op voorwaarde dat hulle nie die provinsie sonder toestemming mag verlaat nie.
Die saak is uitgestel tot 30 April 2024.
Maar dit gaan goed hier in SA né!
Hoe gaan hulle weet of hulle die provinsie verlaat het of nie?