Gruvonds op Noordwes-leeuplaas gemaak

Foto: Arno de Klerk.

Foto: Arno de Klerk.

Die Nasionale Dierebeskermingsvereniging (NDBV) het Woensdag die Excelsior-leeuplaas naby Tosca in Noordwes met ʼn lasbrief in sy besit deursoek. “Hier het ons bewyse gekry dat groot getalle donkies op ʼn onmenslike manier geslag is. Ons het ook 100 donkievelle gevind,” het die NDBV in ʼn verklaring gesê.

“Die donkies is op ʼn grusame wyse van hul velle gestroop en dit beteken dat die Wet op Dierebeskerming oortree is. Strafregtelike klagtes gaan aanhangig gemaak word,” het die NDBV gesê. Dit is bevestig dat tien donkies op 28 Februarie alleen geslag is.

“Daar is ʼn slagpale op die plaas wat geregistreer is vir die slag van beeste, skape en bokke, maar nie perde nie. Dit is dus ʼn oortreding om donkies hier te slag.

Die NDBV het die Suid-Afrikaanse Polisie se veediefstaleenheid asook die Noordwes se openbare veeartsenydienste van hul vonds in kennis gestel. Klagtes word gelê in terme van die Wet op Dierebeskerming, die Wet op Veediefstal en die Wet op Vleisveiligheid.

“Die NDBV is van mening dat hierdie kommersiële handel is en ook verband hou met die onlangse geval waar 450 donkievelle opgeveil en verkoop is in Hartswater in Noordwes,” het die NDBV gesê. Die NDBV moes drie perde, ʼn donkie en drie skape uitsit by dié veiling op 25 Januarie omdat hulle vlakke van lyding net té hoog was.

Maroela Media het vroeër berig dat dr. Langa Madyibi, ʼn beampte van Noordwes se departement van landbou, gesê het daar is ʼn getekende ooreenkoms wat die belangstelling aandui vir moontlike samewerking tussen Noordwes en ʼn tegnologiese maatskappy in China om hul tegnieke te gebruik om die produksie van donkies in die provinsie te verhoog. Daar is ook verdere samesprekings oor hoe om die diere op ʼn wettige en menslike manier te slag, maar geen besluit is nog tot dusver geneem oor hoe om voort te gaan met die konsep nie.

Foto: Arno de Klerk.

Foto: Arno de Klerk.

Die donkievelle word gekook om gelatien te bekom wat ʼn hoofbestanddeel in “ejiao” is. Ejiao word ook as ʼn bloedtonikum beskryf wat onder meer kan help om bloeding te stelp terwyl dit ook glo bloedsirkulasie verbeter. Chinese glo die gelatien het teenverouderingseienskappe en kan slapeloosheid en duiseligheid voorkom.

Volgens die Independent word die gelatien in ʼn harde jel verkoop wat in warm water of alkohol opgelos word. Dit kan ook as ʼn room vir beensere aangewend word.

Die velle op die leeuplaas word intussen na ʼn plek van veiligheid verskuif.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Eric

Ek wil net baie graag weet het hulle gesien dat donkies op wreedaardige manier geslag is of het hulle dit sommer aangeneem?
En as jy met donkies boer en hul slag vir hulle velle wat is die verskil of jy beeste slag ? Beesvelle produkte is hele wereld vol wat is nou presies die verskil?

Niel

Dit is absoluut walglik en wreed, ek hoop die skuldiges word vasgetrek

Piet Badenhorst

Kyk bietjie mooi, die saak het n ander kant.
Donkie vleis word jare al aan Krokkodille en Leeus gevoer.
Ek vermoed iemand wil die handel in Donkie velle domineer vir eie gewin.

Alida

BARBAARS!!! Wat verwag mens as nommer een nog aan toordokers en voorvaders glo. St 3 mentaliteit.

m

So barbaars.