‘Hospitale nie speelterrein vir kriminele’

Die Carolina-hospitaal is op 17 Junie deur gewapende mans geteiken (Foto: Verskaf)

“Hospitale is nie speelterrein vir kriminele nie.”

Só sê Vusi Shongwe, LUR vir gemeenskapsveiligheid in Mpumalanga, ná ʼn aanval op ʼn kliniek Sondagoggend waartydens ʼn ambulansbestuurder beseer is en die ambulans gekaap is.

Volgens Moeti Mmusi, woordvoerder van die departement van gemeenskapsveiligheid, het ʼn onbekende groep mans ʼn vuurwapen op ʼn sekuriteitswag by die ingang van die Pholansikazi-gemeenskapsgesondheidsentrum in Mbombela gerig.

“Die mans het drie skote op ʼn ambulansbestuurder afgevuur voordat hulle die ambulans gekaap het,” bevestig Mmusi. “Die bestuurder het ligte beserings opgedoen en het mediese behandeling ontvang.”

Die departement het ʼn sekuriteitstaakspan – wat hy gekontrakteer het – na die toneel ontbied, wat die gekaapte ambulans agterna gesit het. Die ambulans is sowat twee kilometer van die kliniek teruggekry.

Dié aanval volg ʼn week nadat ʼn groep gewapende mans op die Carolina-hospitaal toegeslaan en personeel beroof het.

Maroela Media het vroeër berig ʼn groep mans het verlede Saterdag omstreeks 01:00 die hospitaal se personeel en pasiënte geterroriseer asook die mediese toerusting en meubels in die ongevalle-eenheid beskadig.

Volgens Mmusi is dié groep mans hospitaal toe geneem nadat ʼn geveg tussen die plaaslike taverne-eienaar en sy klante uitgebreek het. Die groep mans, wat deel was van ʼn bende, het na bewering die taverne-eienaar aangeval.

“Die polisie is na die taverne ontbied en ʼn skietgeveg het gevolg. Die beseerdes is daarna na die Carolina-hospitaal geneem. Die persoon wat die beseerdes hospitaal toe geneem het, het aan sy beserings bewyk, waarna die groep die hospitaal begin vandaliseer en die personeel aangeval en beroof het.”

Veiligheid en sekuriteit is ná hierdie voorval by die hospitaal opgeskerp.

Volgens Shongwe mag die barbaarse en hartelose gedrag teenoor gesondheidswerkers nie geduld word nie.

“Om net die voorvalle te veroordeel is nie genoeg is nie en die regering sal voortgaan om harder te werk om enige veiligheidsbedreigings by hierdie fasiliteite te identifiseer, met die oog daarop om voortdurend bedreigings uit te skakel,” sê Shongwe.

“Die departement sal voortgaan om met gekontrakteerde sekuriteitsdiensverskaffers en ander relevante belanghebbendes in gesprek te tree om beter maniere te vind om hospitale en klinieke te beskerm.”

Shongwe doen verder ʼn beroep op gemeenskappe om die regering by te staan in sy pogings om hierdie fasiliteite en praktisyns te beskerm. Hy sê hierdie instellings bestaan uitsluitlik om te verseker dat gemeenskappe toegang tot gesondheidsdienste het.

“Terwyl ons onverpoos werk om gesondheidsorgfasiliteite en personeel te beveilig, het ons ook gemeenskappe nodig om te help deur enige verdagte aktiwiteite of mense by die polisie aan te meld. Die aanvalle op hierdie fasiliteite en personeel is die ergste vorm van wetteloosheid. Daarom moet gemeenskappe saam met ons werk en kwaaddoeners ontbloot.”