Jong pa steeds in koma ná betonblok deur voorruit bars

Die binneruim van die bakkie nadat die betonblok deur die voorruit gebars het.

ʼn Jong pa van Rustenburg word steeds in ʼn kunsmatige koma gehou nadat ʼn boosdoener Vrydag in die vroeë oggendure ʼn betonblok deur sy bakkie se voorruit gegooi en dit sy gesig bykans vergruis het.

JC Roos (26), ʼn werktuigkundige vir Mercedes-Benz, sy vrou, Claudia (26), wat vir ʼn ouditeursfirma werk, en hulle 13 maande oue dogtertjie Alliana was op die N4 van Rustenburg na Claudia se ma in Welkom op pad toe die betonblok omstreeks 03:30 deur hulle bakkie se voorruit gebars het, het Henry Foster, Claudia se broer, gesê.

JC het weens die impak sy bewussyn verloor en hul voertuig het ʼn ent verder, agter ʼn bultjie langs die hoofweg, tot stilstand gekom. Claudia het ʼn paar skraapmerke opgedoen en Alliana was ongedeerd in haar karstoeltjie.

Claudia het onmiddellik vir Henry, wat in Krugersdorp woon, gebel en gesê dat hulle in ʼn ongeluk was. In dié stadium het ʼn man na die voertuig aangestap gekom. Claudia het aanvanklik gedink hy kom die gesin help.

“Hy het ʼn vuurwapen gehad en aan Claudia se venster geklop. Sy het nie oopgemaak nie en hy het omgestap na JC se kant van die voertuig. Die venster daar het uitgeval, die dakliggie het gebrand, die toeter het geskree, dit was chaos,” het Foster gesê.

“Hy het sy kop ingesteek en gevra vir geld. My sussie het gesê hulle het nie geld nie en het gesê hy moet haar foon vat. Sy het gesmeek vir hulle lewens. Sy het gesmeek dat hy hulle net nie moet skiet nie.”

Claudia en JC Roos. (Foto: Facebook)

Die man, met ʼn klapmus en wit handskoene aan, het oor ʼn bewustelose en erg beseerde JC na die foon gekyk en met leë hande weggestap, het Foster gesê.

Foster het intussen ʼn ambulans ontbied en self in sy motor gespring en na die ongelukstoneel gejaag. Hy het aanvanklik die Hartbeespoort-polisie gebel, maar dié het gesê die ongeluk het nie in hulle polisiëringsgebied gebeur nie. Hy het daarna die Brits-polisie probeer bel, maar ook vergeefs – dié nommer was buite werking.

JC het intussen sy bewussyn herwin en probeer praat. Sy ouers het van Rustenburg na die toneel gejaag en kort voor Foster daar aangekom. Die ambulans het intussen ook opgedaag en JC na ʼn hospitaal in Brits geneem waar hy gestabiliseer is. Hy is daarna met ʼn lugambulans na die Milpark-hospitaal in Johannesburg gevlieg.

Sy skedel is gekraak, sy verhemelte het oopgebars en daar is swelling op sy brein. Hy is ook aan ʼn asemhalingsmasjien gekoppel, maar is in ʼn bestendige toestand, het Foster gesê.

Hy het Vrydagmiddag reeds ʼn operasie ondergaan en gaan na verwagting Woensdag nog ʼn operasie ondergaan.

“Ons het net gebede nodig. Die res is uitgesorteer. Dit moes nóóít gebeur het nie, maar ons moet berusting vind. JC lewe en hy kan sy kind sien grootword,” het Foster gesê.

“Ons wil ook hê ander mense moet bewus wees van wat op daardie pad gebeur. Daai ou wat die klip gegooi het, weet nie eens wie in die kar is nie. Hy is opportunis, hy gooi die klip en hoop hy tref iets. Miskien kan ons iemand anders dieselfde trauma spaar.”

Die bakkie waarin die Roos-gesin gery het.

Foster het gesê terwyl hulle nog op die toneel was, het ʼn ander motoris ook ʼn klip in die pad getref en dié persoon moes ook noodgedwonge stilhou weens ʼn pap wiel.

Volgens hom is Claudia diep getraumatiseer deur die gebeure. Sy sal waarskynlik vandeesweek nog traumaberading ontvang om haar te help om die voorval te verwerk.

Sy en Alliana woon intussen by die Fosters om naby JC in die hospitaal te wees.

Kapt. Aafje Botma, polisiewoordvoerder in Noordwes, het gesê klagte van poging tot moord en poging tot roof is by die Brits-polisie aanhangig gemaak. Die saak word ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

59 Kommentare

jongste oudste gewildste
Hannetjie

Om beskaaf kommentaar te lewer op hierdie daad is net nie moontlik nie.So…ek gaan liewer nie pen wat en eintlik wil se nie.Kom laat ons bid vir hierdie gesin…en vir ons geliefdes en ander op die paaie

Wiki

Buite ons jurisdiksie … nommer werk nie …. Dis ‘n skande!
Sterkte vir julle.

Anel

Lê ook sommer klagtes teen lede van die Hartebeespoort en Brits SAPD. Pligversuim. Om te sê dis nie jou wyk nie is absolute snert. As jy dan die werk wil doen nie, wat soek julle nog daar?

S de Villiers

Ek wil weet of gaan Bakwena wat die tolpaaie beheer iets gaan doen aan die probleem brue van hulle?Hulle kon mos nou al lankal skerms weerskante opgesit het.

toy

Het die regering oogklappe aan of wat. Die kriminele floreer en onskuldige mense loop deur.