Te midde van hernieude oproepe uit die drankbedryf dat die verbod op drankverkope vir tuisgebruik opgeskort moet word, gaan die polisie voort om toe te slaan op diegene wat ten spyte van die verbod steeds drank verkoop.
In een van die jongste voorvalle is ʼn 49-jarige man van Klerksdorp in Noordwes aangekeer nadat die polisie Donderdag op sy huis in Meiringspark toegeslaan het.
Sers. Amogelang Malwetse, polisiewoordvoerder, sê die polisie het ʼn wenk gekry dat drank in die agterplaas gestoor en daarvandaan verkoop word.
Die man het glo aanvanklik ontken dat hy enige drank het. Dit is opgespoor nadat die polisie die perseel deursoek het.
“Hy het later erken dat hy dit verkoop,” het Malwetse gesê.
Die man is ʼn boete van R3 000 opgelê vir die oortreding van die Rampbestuurswet, terwyl die polisie ook beslag gelê het op sowat R125 000 se drank.