Kommer oor geskiedenis as verpligte skoolvak

Argieffoto (Foto: Pexels, Pixabay)

Die burgerregteorganisasie AfriForum bevraagteken die plan van die minister van sport, kuns en kultuur, Nathi Mthethwa, dat geskiedenis ’n verpligte skoolvak moet word.

“Vir geskiedenis om te inspireer en insig in die komplekse aard van die verlede te skep, is dit nodig dat feite objektief aangebied word,” sê Alana Bailey, hoof van kultuursake by AfriForum. “Die denkraamwerk van ons voorouers verskil hemelsbreed van dié van mense in die 21ste eeu en as geskiedenis as wetenskap aangebied word, moet daar juis teen enige eensydige interpretasie van gebeure gewaak word.”

Bailey sê geskiedenis kan óf dien om wedersydse erkenning en respek tussen gemeenskappe te bevorder, óf die teendeel bereik, naamlik om hulle verder te polariseer en minderhede as sondebokke voor te hou.

“Om by almal in die land waardering te skep vir die bydraes en opoffering van die geslagte wat ons voorafgegaan het, soos die aanhef tot die Grondwet inderdaad noem, kan daar nie ’n beeld van die verlede geskep word waar sommige figure in die openbaar geduld mag word, maar ander net in spesiale ruimtes gesien mag word nie.”

Bailey verwys na die onlangse uitlatings oor die sogenaamde aanstootlikheid van standbeelde wat voor 1994 opgerig is. “Dit illustreer juis die gebrek aan nuansering.”

Sy voer aan dat die regerende party juis dalk geskiedenis as propaganda-instrument wil inspan en feite wil verdraai om by sy ideologiese raamwerk in te pas.

“AfriForum bevorder die gebalanseerde aanbieding van die geskiedenis deur middel van uiteenlopende projekte en stel hom ten doel om die skepping van mites, slagoffers en sondebokke, asook alle ander vergrype met die wyse waarop die verlede vir ideologiese doeleindes weergegee word, bloot te lê en met feite te troef.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Roggeveld

Geskiedenis kurrikulum moet per volk aangepas en aangebied word, anders sal net die ANC se propaganda in ons kinders se kele afgeforseer word. Elke volk moet insae hê in die geskiedenis wat vir sy kinders aangebied word.

Susan

Die geskiedenis is eensydig en moet ons kinders laat skuldig voel dat hulle wit is.

Misky

As alle kante van geskiedenis aangebied is en kinders alle geskiedenis kon leer, dan ja. Maar dis n eensydige beeld van geskiedenis wat nou in hul keelgatte forseer word. Geen kind word rassisties gebore nie, dit word aangeleer en hulle word gebreinspoel om net n sekere sieninge te glo.

Suzette

Afriforum – dankie vir wat julle doen! Hier sal hard geveg moet word want die regering wil ‘n eensydige geskiedenis daarstel deurspek met leuens en wil dit dan as die waarheid aan huidige en nuwe geslagte verkoop. Dit kan eenvoudig nie toegelaat word nie.

Androclus

Ons kinders moet leer van die ANC wat in 1912 gestig en nou kom leer van wanneer het Zuma president geword en hoe korrupsie gedoen moet word.