Krag na verskeie dele van Kaapstad is teen Dinsdagmiddag herstel, nadat die brand van hoogspanningkabels inwoners sedert Maandagaand sonder elektrisiteit gelaat het.
Krag is reeds na Woodstock, Vredehoek, Tuine, Tamboerskloof, Distrik Ses en die oostelike dele van die middestad herstel.
“Daar is egter steeds dele van die Atlantiese kusstrook en die middestad wat sonder krag is en ons spanne werk onverpoos om die krag so gou as moontlik deur die Tafelbaai-substasie te herstel,” het die Stad in ʼn verklaring gesê.
Luidens die verklaring het werkers van die stad deurnag gewerk om te verseker dat die kragtoevoer onmiddellik herstel word.
Die oorsaak van die kragonderbreking is intussen geïdentifiseer as grootskaalse skade aan een van Eskom se hooftoevoerkabels. Dit het tot gevolg gehad dat al die kabels wat krag aan area 7 verskaf, onklaar geraak het.
Die stad verwag dat alle kragtoevoer teen vanaand herstel sal wees.
Inwoners is aangemoedig om elektriese toestelle liefs af te skakel. Verkeersreëlaars is intussen by groot kruisings ontplooi om die vloei van die verkeer te vergemaklik.