(Argieffoto: ER24)
Polisieduikers het die liggaam van ʼn man uit die Trichardtspruitrivier in Mpumalanga gehaal, nadat ʼn lid van die plaaslike boerderygemeenskap dit vanoggend opgemerk het.
Russel Meiring, woordvoerder van ER24, het gesê die polisie se soek-en-reddingseenheid was omstreeks 09:45 Woensdag op die toneel. Hulle het die liggaam na die oewer gebring, waar paramedici gewag het.
“Ongelukkig was die man reeds ʼn geruime tyd dood. Ons kon niks vir hom doen nie,” het Meiring gesê.
Die oorsaak van die man se dood is in dié stadium nog onbekend. Die polisie ondersoek die voorval.
