Marno uit ICU

Marno Muller kan in die gewone saal weer besoekers ontvang (Foto: Bid asb vir Marno Muller, Facebook)

Klein Marno Muller (5) is Maandag uit die intensiewesorgeenheid (ICU) van die Netcare Garden City-hospitaal in Johannesburg na ’n gewone saal oorgeplaas.

Volgens Nadia Minnie, Marno se tannie, is die dokters en spesialiste baie tevrede met Marno se vordering en die familie hoop dat hy sommer vinnig ontslaan sal word.

Die dokters gaan Dinsdag met Marno se ma, Helga Muller, praat oor hoe lank die kleuter in die gewone saal moet bly.

“Die dokters het aanbeveel dat Marno daarna na ’n rehabilitasiesentrum gestuur word, ’n instansie buite die hospitaal,” het Minnie gesê.

Marno sal basies alles weer van vooraf moet leer doen en gaan arbeid‑, spraak‑ en fisioterapie moet kry.

Marno is byna ’n maand gelede in ’n ernstige toestand in die hospitaal opgeneem nadat hy op ʼn glyplank by sy kleuterskool in Brakpan aan die toutjies van sy baadjie gewurg het.

Hy was drie weke lank in ’n geïnduseerde koma en is verlede Sondag uit sy koma gebring.

Hy het sedertdien by die dag tekens van beterskap getoon en sy familie is positief oor die pad vorentoe.

Volgens Minnie weier die kleuter steeds om te sluk en die dieetkundige gaan Dinsdag by hom ’n draai maak.

Marno kon die afgelope naweek met behulp van ’n fisioterapeut sy eerste treë sedert die fratsongeluk gee.

Verskeie fondsinsamelings is vir Marno begin om die familie met die hospitaalkostes te help.