Medestigter van satanistiese kerk in SA bekeer hom

Riaan Swiegelaar vertel waarom hy die satanistiese kerk en satanisme die rug gekeer het. (Foto: Facebook)

Riaan Swiegelaar, medestigter en woordvoerder van die Suid-Afrikaanse Satanistiese Kerk, het dié organisasie die rug gekeer en hom tot God bekeer.

Swiegelaar verduidelik in ʼn Facebook-video hoe hy in die eerste plek by satanisme betrokke geraak het en wat tot sy bekering gelei het. Die video is Maandag op sy Facebook-blad gedeel, na aanleiding van “verskeie versoeke om onderhoude” wat hy glo die afgelope paar dae ontvang het.

“Ek het aanklank daarby gevind omdat ek baie gebroke en baie hartseer was, sonder dat ek dit besef het. Ek dink die rede waarom soveel mense by satanisme aanklank vind, is omdat hulle uit ʼn gebroke plek kom.”

Hy het die afgelope drie jaar duisende sataniste ontmoet en die een ding wat hulle almal gemeen het, is dat hulle gebroke is, sê Swiegelaar.

Swiegelaar het sowat vier jaar gelede by satanisme betrokke geraak en het daarna gehelp om die satanistiese kerk in die openbaar bekend te stel. “In daardie stadium het ek geglo dit is my waarheid en dit is wat my werklikheid is – maar ek het nie besef hoe gebroke ek was nie.

“Ek is nie vandag hier om te sê ek is nie ʼn slagoffer nie. Ek was beslis nog nooit ʼn slagoffer nie en het ook nog nooit beweer ek is nie.”

Swiegelaar verduidelik dat hy sy lewe lank nog nooit onvoorwaardelike liefde ondervind het nie, maar dat ʼn handvol spesifieke Christene dit onlangs aan hom gewys het.

Die keerpunt was toe hy sowat twee maande gelede ʼn onderhoud by ʼn Kaapse radiostasie gedoen het. Daar het hy ʼn vrou ontmoet met wie hy vantevore nog net aanlyn kontak gehad het, terwyl reëlings vir onderhoude met hom getref is. Sy het ná sy onderhoud – vir die eerste keer in persoon – na hom gekom en hom vasgehou en gedruk, vertel Swiegelaar terwyl hy trane afvee.

In dié onderhoud het Swiegelaar onder meer gesê hy glo nie in Christus of dat Jesus Christus bestaan nie en “ek hét ook nie”.

“Selfs nadat ek dit gesê het, het sy vir my ʼn druk gegee en my vasgehou op ʼn manier waarin ek nog nooit liefgehad was nie.”

Swiegelaar sê hy het later op Facebook gesien dié vrou is ʼn Christen en haar optrede het hom bygebly. ʼn Week later moes hy ʼn satanistiese ritueel uitvoer om hom te wys hoe sy pad vorentoe lyk en hoe hy meer mag kan bekom, toe Jesus aan hom verskyn het.

“Jesus het verskyn en ek was geweldig arrogant en het gesê ‘wat ook al’. As jy Jesus is, bewys dit,” vertel hy in trane in die video.

“Hy het my oorspoel met die mooiste liefde en energie en ek het dit dadelik herken – want die vrou by die radiostasie het dit aan my gewys. Dis hoe ek die liefde van Christus herken het.”

Swiegelaar sê diegene wat geestelike oorlogvoering verklaar of oordeel, lewe nie volgens Christus se liefde nie. “Die liefde van Christus is onvoorwaardelik.”

Volgens Swiegelaar het hy lank geglo dat hy nie God se genade waardig is nie, onder meer omdat hy gay is en ʼn spirituele geneser is.

“Laat ek vandag vir julle iets vertel: Die koninkryk van God is nie ʼn geslote gemeenskap nie. Die koninkryk is oop vir almal. Dit word genade genoem, mense.”

Swiegelaar sê God is oral en Hy kan Hom enige plek openbaar – en dat mense kan kies om God se genade te aanvaar. “Hierdie was my geleentheid en ek het dit aangegryp. Ek het die keuse gemaak. Ek het lig gekies. Ek lewe vir die lig.”

Hy pleit by mense om liefde te betoon wanneer die kans daar is. “As jy die geleentheid het om lief te hê, is daardie liefde nooit verlore nie.”

Swiegelaar sê hy gaan voortaan fokus op die genesing van mense.

“Ek wil mense net liefhê.”

Hy sê hy het die afgelope ruk honderde versoeke vir onderhoude gekry en is onder meer gepols oor sy talle tatoeëermerke en lyfgaatjies. “As jy nou nog fokus op tatoeëermerke en gaatjies en dinge soos daardie… daar’s veel belangriker dinge as mense se tatoeëermerke.”

Hy gaan nietemin sommige van sy tatoeëermerke laat verwyder.

Swiegelaar sê hy is, sedert hy die kerk verlaat het, ook heelwat uitgevra oor hoëprofiellede van die satanistiese kerk. Hy het egter ʼn vertroulikheidsooreenkoms met die kerk aangegaan en respekteer selfs daarsonder mense se privaatheid en gaan dus nie kommentaar lewer nie.

Hy sê hy meen die kerk, waarvan hy lank die openbare beeld was, sal bly voortbestaan en is in hierdie stadium reeds enorm.

“Al wat ons kan doen, is om liefde te bewys. Ons kan nie mense dwing om te kies nie; ons kan net opdaag en verteenwoordigend van onvoorwaardelike liefde wees.”

Swiegelaar het in hierdie stadium geen voorneme om by enige kerk aan te sluit nie. “Ek sal nie daarheen gaan nie, omdat ek bitter seergemaak is daardeur.

“God praat op soveel verskillende maniere met ons, maar dit is ons keuse of ons dit wil voel of nie. Daar is nie veroordeling nie, daar is nie oordeel nie. Dit is perfekte liefde en dit is genade en dit is vir almal beskikbaar.”

Kyk hier na die volledige video.