Meer as 800 SA’ners in buitelandse tronke

Tristan Lee Niemand van Oos-Londen word al langer as ’n maand in China aangehou, glo onder haglike omstandighede. Foto: Facebook

Die minister van internasionale betrekkinge en samewerking is uiters bekommerd oor die toenemende aantal Suid-Afrikaners wat in buitelandse tronke aangehou word.

Wêreldwyd sit meer as 800 Suid-Afrikaners agter tralies vir alles van visumverwante oortredings tot dwelmhandel en ʼn magdom ander misdade.

In die jongste opspraakwekkende voorval word die 19-jarige Tristan-Lee Niemand van Oos-Londen al amper ʼn maand lank in China aangehou, glo onder haglike omstandighede, nadat sy gehoop het om daar Engels te gee.

Die departement van internasionale betrekkinge en samewerking (Dirco) sê na sy wete het sy China met ʼn kortverblyfvisum binnegegaan. Sy is op 16 November in hegtenis geneem omdat die owerheid vermoed het sy werk onwettig in die land as Engels-onderwyseres.

Geen besoeke aan of telefoonoproepe na aangehoudenes word toegelaat nie.

“Die ondersoek deur die Chinese buro vir openbare veiligheid duur voort,” sê die departement. Kragtens die regulasies in die provinsie Jiangsu word geen besoeke aan of telefoonoproepe na aangehoudenes toegelaat terwyl hul geval ondersoek word nie.

Dirco is wel deurentyd in verbinding met Tristan-Lee se bekommerde ma, Stacey-Lee Niemand, en het onderneem om die familie op die hoogte te hou van enige verwikkelinge in die saak. “Ongelukkig beteken konsulêre bystand nie dat Dirco Suid-Afrikaners uit aanhouding kan bevry of dat die departement in die regsproses in China kan inmeng nie.”

Altesaam 98 is die afgelope ses maande in China aangehou vir visumoortredings.

Lindiwe Sisulu, minister van internasionale betrekkinge en samewerking, het gesê van die 800 Suid-Afrikaners wat in buitelandse tronke aangehou word, is meer as 200 in Suid-Amerika nadat hulle op dwelmverwante aanklagte skuldig bevind is. Altesaam 98 is die afgelope ses maande in China aangehou vir visumoortredings, van wie 23 steeds in aanhouding is terwyl die Chinese polisie die aanklagte teen hulle ondersoek.

Sisulu doen ʼn beroep op Suid-Afrikaners wat in die buiteland reis om by die departement of diplomatieke sendings oorsee te registreer en seker te maak hulle het die regte dokumente.

“Dit is uiters ontstellend dat so baie Suid-Afrikaners in die buiteland in hegtenis geneem of aangehou word,” sê Sisulu, en voeg by sy het die direkteur-generaal van die departement gevra om seker te maak dat al 800 aangehoudenes konsulêre bystand kry en buitelandse sendings hulle help om in aanraking met hul naasbestaandes by die huis te bly.

Sisulu het onderneem om met haar Chinese eweknie in verbinding te tree oor die groot aantal Suid-Afrikaners wat in China aangehou word weens visumverwante oortredings. “Jong mense wat in China wil Engels gee, moet seker maak hulle raadpleeg die Chinese ambassade en gebruik geloofwaardige agente wat hul reisreëlings tref.”

Enige Suid-Afrikaner wat na die buiteland reis, kan die departement se 24-uur-hulplyn by 012 351 1000 bel as hulle bystand nodig het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Pierre

So omdat hul gearresteer word omdat hul die wet oortree, kan jy nie hul vertrou nie…maar tog moan jul in SA dat die regering niks doen teen kriminele nie? As jy die wet oortree, is jy n misdadiger, so eenvoudig soos dit, of dit nou met visum of moord te doen het, RESPEKTEER die land se wette.

Jack Russl

Baie gevalle moet die mense net eerlik wees. Moet nie ‘n visa uitneem en voorgee jy gaan vakansie hou as jy eintlik gaan werk en ‘n werksvisa nodig het nie. Doen in die land wat jou visa jou toelaat.

Die klomp wat dwelm verwante oortredings het is dit hulle eie skuld. Almal weet hoe streng daardie lande is, hoekom nog die kans waag.

Amelia

My wens vir 2019 is dat ons patetiese SA tog ook ordentlike wette moet toepas op al die gespuis wat hier nesskop. Ek weet van n hele klomp wat nie eens in n huis bly nie, maar in n winkel. Dan kan hul geen taal praat wat ons kan verstaan nie.

Hanna Hoekom

Ek werk self in n godsvreemde land en kan verstaan hoe maklik dit is om in die “moeilikheid” te beland. Baie van die visums en papierwerk is in tale wat ons nie kan lees nie. Vra maar enige iemand wat al n Arabiese iqama gehad het! Een van my kollegas het amper groot probleme gehad omdat haar tweede naam in Arabies op haar ID kaart verkeerd gespel was… Hoe moes sy weet? Moet nie te vinnig oordeel nie. Mense kry finansieel swaar in Suid-Afrika en wyk dan uit na China en Arabiese lande min wetende in watter tipe moeilikheid jy… Lees meer »

Muil

Laat my dink aan daardie keer toe ek ‘n geskenkpakkie van oom Pablo Escobar vanaf Suid-Amerika na Johannesburg gebring het vir sy vriend Frik.