Mej. SA 2020 se drie wenners, Thato Mosehle, Shudufhadzo Musida en Natasha Joubert (Foto: Mej. SA-organisasie)
Die Mej. Suid-Afrika-kompetisie is vanjaar vir die eerste keer ook oopgestel vir transgender-deelnemers, hoewel daar vrae is oor die kwessie of dié persone internasionaal sal mag deelneem indien hulle wen.
Nadat die Mej. Suid-Afrika Organisasie Maandag weer die inskrywings geopen het vir 2021 se Mej. Suid-Afrika, het hulle op hul webwerf laat hoor dat transgender-mense vir die eerste keer ook aan die kompetisie mag deelneem.
“Trans-vroue sal in aanmerking kom om in te skryf vir die Mej. Suid-Afrika-kompetisie, maar om internasionaal te mag deelneem, moet die deelnemers ʼn geldige Suid-Afrikaanse identiteitsdokument hê wat hul aangepaste geslag as vroulik aandui,” lui hul webwerf.
Daar het nog nooit vantevore ʼn transgender-persoon aan die Mej. Suid-Afrika-kompetisie deelgeneem nie, hoewel die internasionale Mej. Heelal-kompetisie dit al in 2018 toegelaat het toe Mej. Spanje, Angela Ponce, die eerste transgender-deelnemer aan dié kompetisie geword het.
Mej. Suid-Afrika word beskryf as ʼn leierskapplatform vir ambisieuse jong vroue in Suid-Afrika deur middel van ʼn skoonheidskompetisie-proses.
“Hulle word gevorm as ambassadeurs van ons land, hulle word vegters vir vroueregte en stemme van leierskap, asook slim sakevroue wat jong Suid-Afrikaners inspireer om hul volle potensiaal te bereik.”
