Die polisie in Noordwes het ʼn man van Orkney aangekeer in verband met die moord op sy eksmeisie.
Die 55-jarige man het sy gewese maat glo Vrydag in die vroeë oggendure om die lewe gebring, waarna die polisie in sy woonplek op haar lewelose liggaam afgekom het, sê kol. Amanda Funani, Noordwes-polisiewoordvoerder.
Luidens berigte het ʼn vriendin van die oorledene haar Woensdag by die polisie as vermis aangemeld. “Sy het verklaar die slagoffer is die laaste keer in die verdagte se voertuig gesien,” sê Funani.
Vrydag het die polisie die verdagte genader. “Hy het hulle na sy huis gelei, waar die slagoffer in ʼn plas bloed met ʼn kopwond aangetref is. Sy is op die toneel dood verklaar.”
Die verdagte bly in polisieaanhouding tot hy na verwagting Maandag in die plaaslike landdroshof op ʼn aanklag van moord sal verskyn, sê Funani.
Lt.genl. Baile Motswenyane, provinsiale polisiekommissaris, het die moord veroordeel en sê dis “hartseer om te hoor mense wend hulle tot geweld om hul probleme op te los”.
Sy het die beamptes gelukgewens met die vinnige inhegtenisneming van die moordverdagte en waarsku oortreders die polisie sal alles in hul vermoë doen om wetsoortreders aan die kaak te stel.
MM, asb korregeer asb die berig. Die slagoffer het in ‘n plas bloed gelê, nie die verdagte nie.
Dagsê Verstaan nie mooi,
Dankie vir jou oplettendheid.
Groetnis,
Morné nms. Maroela Media